സ്വന്തം ലേഖകൻ: കുവൈത്തിൽ മേയ് ഒന്ന് ഞായർ മുതൽ നാല് ബുധൻ വരെ ബാങ്ക് അവധിയായിരിക്കുമെന്ന് ബാങ്കിങ് അസോസിയേഷൻ അറിയിച്ചു. എന്നാൽ, പെരുന്നാളിനോട് അനുബന്ധിച്ചുള്ള മേയ് അഞ്ച് വ്യാഴാഴ്ച എല്ലാ ബാങ്കുകളുടെയും ഹെഡ് ഓഫിസുകൾ പ്രവർത്തിക്കും.
രാജ്യത്തെ ആറു ഗവർണറേറ്റുകളിലെയും പ്രധാന ബ്രാഞ്ചുകൾ വഴിയും മേയ് അഞ്ചിന് പൊതുജനങ്ങൾക്ക് ബാങ്കിങ് സേവനങ്ങൾ നടത്താം. മേയ് എട്ട് ഞായറാഴ്ച മുതലാണ് എല്ലാ ബ്രാഞ്ചുകളും സാധാരണ രീതിയിൽ പ്രവർത്തിച്ചുതുടങ്ങുകയെന്നും ബാങ്കിങ് അസോസിയേഷൻ വക്താവ് ശൈഖ് അൽ ഈസ അറിയിച്ചു. ഈദുൽ ഫിത്ർ പ്രമാണിച്ച് സർക്കാർ അഞ്ചുദിവസത്തെ പൊതുഅവധി പ്രഖ്യാപിച്ചിരുന്നു.
ഈ സാഹചര്യത്തിലാണ് ബാങ്കുകളുടെ അവധി സംബന്ധിച്ച് അസോസിയേഷൻ വ്യക്തത വരുത്തിയത്. അതിനിടെ പെരുന്നാൾ പ്രമാണിച്ച് പുതിയ കറൻസികൾ രാജ്യത്തെ എല്ലാ ബാങ്കുകളിലും ലഭ്യമാക്കുമെന്നു സെൻട്രൽ ബാങ്ക് അറിയിച്ചു. കാൽ ദീനാർ, അര ദീനാർ, ഒരു ദീനാർ പുത്തൻ നോട്ടുകൾക്കാണ് പെരുന്നാൾകാലത്ത് ആവശ്യക്കാർ വർധിക്കുക.
അഞ്ച്, പത്ത്, 20 ദീനാർ നോട്ടുകളും ഈദ് അവധിക്കുമുമ്പ് മതിയായ അളവിൽ ബാങ്കുകളിൽ ലഭ്യമാക്കുമെന്ന് അധികൃതർ അറിയിച്ചിട്ടുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല