സ്വന്തം ലേഖകൻ: കുവൈത്തിൽ കോവിഡ് വാക്സിൻ ബൂസ്റ്റർ ഡോസ് വിദേശികൾക്കും നൽകുന്നു. ഇതു സംബന്ധിച്ച അറിയിപ്പ് മുൻഗണന പ്രകാരം അയച്ചു തുടങ്ങി. രോഗം പകരാൻ ഏറ്റവും കൂടുതൽ സാധ്യതയുള്ള ആരോഗ്യ പ്രവർത്തകർ, 60 വയസ്സ് കഴിഞ്ഞവർ, പ്രതിരോധശേഷി കുറക്കുന്ന മറ്റു രോഗങ്ങൾ ഉള്ളവർ എന്നീ വിഭാഗങ്ങളിൽ പെടുന്നവർക്കാണ് ആദ്യഘട്ടത്തിൽ ബൂസ്റ്റർ ഡോസ് നൽകുന്നത്.
കുവൈത്തിൽ താമസിക്കുന്ന വിദേശികളിൽ അർഹരായവർക്ക് ഫൈസർ വാക്സിന്റെ മൂന്നാം ഡോസ് നൽകുന്നതിന്. നിശ്ചയിച്ച തീയതി അടങ്ങുന്ന സന്ദേശം അധികൃതർ അയച്ചുതുടങ്ങി. അതിനിടെ വാക്സിൻ വിവരങ്ങൾ ആവശ്യപ്പെട്ടു വരുന്ന വ്യാജ മൊബൈൽ സന്ദേശങ്ങളെ കുറിച്ച് മുന്നറിയിപ്പുമായി ആരോഗ്യ മന്ത്രാലയം രംഗത്തെത്തി. ഇത്തരം സന്ദേശങ്ങളോടും ലിങ്കുകളോടും പ്രതികരിക്കുമ്പോൾ ജാഗ്രത പുലർത്തണമെന്ന് അധികൃതർ അറിയിച്ചു.
കോവിഡ് വാക്സിനേഷന്‍റെ ഭാഗമായ ബൂസ്റ്റർ വാക്സിൻ സ്വീകരിച്ചവരില്‍ ചിലരുടെ മൊബൈലിലേക്ക് ആരോഗ്യമന്ത്രാലയത്തിന്റെ പേരിൽ വ്യാജ സന്ദേശം എത്തിയ പശ്ചാത്തലത്തിലാണ് ഹാക്കിങ് സാധ്യതയെക്കുറിച്ച് അധികൃതർ മുന്നറിയിപ്പ് നൽകിയത്. വ്യക്തി വിവരങ്ങൾ നൽകിയ ശേഷം വാക്സിന്‍ സർട്ടിഫിക്കറ്റിനായി ലിങ്ക് തുറക്കാന്‍ ആവശ്യപ്പെട്ടായിരുന്നു സന്ദേശം.
ഇത്തരത്തിലുള്ള ലിങ്കുകളോടും സന്ദേശങ്ങളോടും പ്രതികരിക്കുമ്പോൾ ജാഗ്രത പാലിക്കണമെന്നും മൊബൈൽ ഫോണിലെ അക്കൗണ്ട് വിവരങ്ങളും മറ്റും ഹാക്ക് ചെയ്യപെടാൻ കാരണമാകുമെന്നും അധികൃതർ മുന്നറിയിപ്പ് നൽകി. വാക്സിനെടുത്തവരുടെ വിവരങ്ങളും മറ്റും ആവശ്യപ്പെടാറില്ലെന്നും ആരോഗ്യ മന്ത്രാലയം വ്യക്തമാക്കി. വാക്സിൻ സർട്ടിഫിക്കറ്റ് അയച്ചു കൊടുക്കാൻ ആവശ്യപ്പെട്ട് ആരോഗ്യമന്ത്രാലയത്തിന്റെ പേരിൽ ചിലർക്ക് നേരത്തെ വ്യാജഫോൺ കോളുകളും ലഭിച്ചിരുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല