സ്വന്തം ലേഖകൻ: കുവൈത്തിലെ അനധികൃത താമസക്കാര്‍ക്ക് അവരുടെ താമസം ഔദ്യോഗികമായി ക്രമപ്പെടുത്തുന്നതിനായി നല്‍കിയ ഗ്രേസ് കാലാവധി തീര്‍ന്നതായി അധികൃതര്‍. ജൂണില്‍ അവസാനമായി ഗ്രേസ് കാലാവധി നീട്ടിയിരുന്നു. ഇത് അവസാനിച്ച സ്ഥിതിക്ക് അനധികൃത താമസക്കാര്‍ക്കെതിരായ നിയമ നടപടികള്‍ ആരംഭിക്കുമെന്നും കുവൈത്ത് ആഭ്യന്തര മന്ത്രാലയം അറിയിച്ചു.
ഇനി ഇവര്‍ക്ക് പിഴകള്‍ അടച്ച് വിസ ശരിയാക്കി കുവൈത്തില്‍ തുടരാനോ പിഴ കൂടാതെ നാട്ടിലേക്ക് മടങ്ങാനോ അവസരമുണ്ടാവില്ല. ഗ്രേസ് കാലാവധി അവസാനിച്ച സ്ഥിതിക്ക് രാജ്യത്തെ വിവിധ സുരക്ഷാ വിഭാഗങ്ങളുടെ നേതൃത്വത്തിള്ള സംയുക്ത പരിശോധന വ്യാപകമാക്കുമെന്ന് അധികൃതര്‍. നിയമലംഘകരെ കണ്ടെത്തുന്നതിന് വേണ്ടിയാണിത്. ഇവരെ അറസ്റ്റ് ചെയ്യുന്നതുള്‍പ്പെടെയുള്ള നടപടികള്‍ സ്വീകരിക്കും.
ഗ്രേസ് കാലാവധി അവസാനിച്ചതിന് ശേഷമുള്ള ഓരോ ദിവസത്തിനും ഒരു കുവൈത്ത് ദിനാര്‍ എന്ന തോതിലാണ് പിഴ ഈടാക്കുക. പിഴ ഈടാക്കിയ ശേഷം ഇവരെ നാടുകടത്തുകയും ചെയ്യും. ഇങ്ങനെ നാട്ടിലേക്ക് അയക്കപ്പെടുന്നവര്‍ക്ക് ഇനിയൊരുക്കലും കുവൈത്തിലേക്ക് തിരികെ വരാന്‍ സാധിക്കില്ലെന്നും അധികൃതര്‍ അറിയിച്ചു. ഇത്തരം അനധികൃത താമസക്കാരുടെ സ്‌പോണ്‍സര്‍മാര്‍ക്കെതിരേയും നടപടി സ്വീകരിക്കും. ഭാവിയില്‍ പ്രവാസി ജീവനക്കാരെ ജോലിക്ക് നിയമിക്കാനുള്ള അനുമതി ഇവര്‍ക്ക് നിഷേധിക്കുന്നത് അടക്കമുള്ള നടപടികളാണ് സ്‌പോണ്‍സര്‍മാര്‍ക്കെതിരേ കൈക്കൊള്ളുക.
2020 മാര്‍ച്ചിലായിരുന്നു കുവൈത്ത് ഭരണകൂടം ആദ്യമായി വിസാ ലംഘകര്‍ക്ക് പൊതുമാപ്പ് പ്രഖാപിച്ചത്. ആ സമയത്ത് രാജ്യത്ത് ഒരു ലക്ഷത്തിലേറെ പേരായിരുന്നു അനധികൃത താമസക്കാരായി ഉണ്ടായിരുന്നത്. എന്നാല്‍ കോവിഡ് പ്രതിസന്ധിയെ തുടര്‍ന്ന് നിരവധി പേര്‍ക്ക് തൊഴില്‍ നഷ്ടമായതിനെ തുടര്‍ന്ന് അനധികൃത താമസക്കാരുടെ എണ്ണം വലിയ തോതില്‍ വര്‍ധിച്ചിട്ടുണ്ടെന്നാണ് അധികൃതരുടെ വിലയിരുത്തല്‍.
മാര്‍ച്ച് മാസത്തില്‍ ആരംഭിച്ച പൊതുമാപ്പ് കാലാവധി മെയ് 31ന് അവസാനിക്കേണ്ടതായിരുന്നു. എന്നാല്‍ കോവിഡ് മഹാമാരിയെ തുടര്‍ന്നുണ്ടായ യാത്രാനിരോധം ഉള്‍പ്പെടെയുള്ള പ്രതികൂല സാഹചര്യത്തില്‍ പൊതുമാപ്പ് കാലാവധി പല തവണകളായി വീണ്ടും നീട്ടുകയായിരുന്നു.
എന്നാല്‍ രാജ്യത്തിന് പുറത്തേക്ക് യാത്ര ചെയ്യാന്‍ നൂറുകണക്കിന് വിമാനങ്ങളാണ് ഇതിനകം സര്‍വീസ് നടത്തിയത്. അനധികൃത താമസക്കാര്‍ക്ക് പിഴ ഇല്ലാതെ നാട്ടിലേക്ക് മടങ്ങാന്‍ ഈ വിമാന സര്‍വീസുകളെ ഉപയോഗപ്പെടുത്താമായിരുന്നു. അതിനാല്‍ ഇനിയും രാജ്യത്ത് തങ്ങുന്ന അനധികൃത താമസക്കാര്‍ ശക്തമായ ശിക്ഷാ നടപടികള്‍ക്കു വിധേയരാവുമെന്നും അധികൃതര്‍ മുന്നറിയിപ്പ് നല്‍കി.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല