സ്വന്തം ലേഖകൻ: രാജ്യത്ത് വിദ്യാഭ്യാസ മേഖലയിൽ സ്വദേശിവത്കരണം നടപ്പാക്കുമെന്നതിന്റെ സൂചനകൾ നൽകി വിദ്യാഭ്യാസ മന്ത്രി. സര്‍ക്കാര്‍ സ്കൂളുകളില്‍ ജോലി ചെയ്യുന്ന വിദേശ അധ്യാപകരെ അടുത്ത സാമ്പത്തിക വര്‍ഷം പിരിച്ചുവിടുമെന്ന് വിദ്യാഭ്യാസ മന്ത്രി ഹമദ് അൽ അദ്വാനി വ്യക്തമാക്കിയതായി വാർത്ത വിതരണ സൈറ്റായ ‘മജ്‍ലിസ്’ ട്വിറ്ററിൽ അറിയിച്ചു.
സ്വദേശിവത്കരണത്തിന്റെ ഭാഗമായി വിവിധ സര്‍ക്കാര്‍ മേഖലയില്‍നിന്ന് വിദേശികളെ ഒഴിവാക്കാന്‍ ലക്ഷ്യമിട്ട് നടത്തുന്ന പദ്ധതിയുടെ ഭാഗമായാണ് നടപടി. പൊതുമേഖലയില്‍ സമ്പൂര്‍ണ സ്വദേശിവത്കരണം പൂര്‍ത്തിയാവുന്നതോടെ ആയിരക്കണക്കിന് വിദേശികള്‍ക്ക് ജോലി നഷ്ടമാകും. മലയാളികൾ ഉൾപ്പെടെയുള്ളവർക്ക് ഇത് തിരിച്ചടിയായേക്കും.
അടുത്തിടെ ഇംഗ്ലീഷ് ഭാഷാ ബിരുധദാരികളായ സ്വദേശി യുവതികള്‍ അധ്യാപകരായി ജോലി നല്‍കണമെന്ന് ആവശ്യപ്പെട്ട് വിദ്യാഭ്യാസ മന്ത്രാലയത്തിനുമുന്നില്‍ ധര്‍ണ നടത്തിയിരുന്നു. രാജ്യത്തെ വിദ്യാഭ്യാസ സ്ഥാപനങ്ങളില്‍ വിദേശ അധ്യാപകരുടെ കുത്തൊഴുക്കാണെന്നും സ്വദേശി അധ്യാപകരുടെ മതിയായ പ്രാതിനിധ്യം ഉറപ്പുവരുത്തണമെന്നും ആവശ്യപ്പെട്ട് പാര്‍ലമെന്റ് അംഗങ്ങളും രംഗത്തുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല