സ്വന്തം ലേഖകൻ: കുവൈത്തിൽ മരുന്നുകളുടെ വില കുതിച്ചുയർന്ന സാഹചര്യത്തിൽ വില നിയന്ത്രിക്കാനുള്ള കർശന നടപടികളുമായി അധികൃതർ. ഇതിന്‍റെ ഭാഗമായി കുവൈത്തിലെ വാണിജ്യ വ്യവസായ മന്ത്രാലയം നടത്തിയ പരിശോധനകളെ തുടർന്ന് ക്രമക്കേടുകൾ കണ്ടെത്തിയ 21 ഫാര്‍മസികളുടെ ലൈസന്‍സ് പിന്‍വലിച്ചു. ഇതോടെ ഏതാനും ദിവസങ്ങൾക്കിടയിൽ അടച്ചുപൂട്ടപ്പെട്ട ഫാർമസികളുടെ എണ്ണം 61 ആയി.
രാജ്യത്ത് അവശ്യ മരുന്നുകൾ ഉൾപ്പെടെയുള്ളവയുടെ വില 85 ശതമാനം വരെ വർധിച്ച സാഹചര്യത്തിലാണ് വില നിയന്ത്രണ നടപടികളുമായി വാണിജ്യ വ്യവസായ മന്ത്രാലയം രംഗത്തെത്തിയത്. ഇതേത്തുടർന്ന് വാണിജ്യ വ്യവസായ മന്ത്രി ഉമര്‍ അല്‍ ഉമര്‍ സ്വകാര്യ ഫാര്‍മസികളുടെയും മരുന്ന് കമ്പനികളുടെയും മേല്‍നോട്ടം വഹിക്കാന്‍ ഒരു പ്രത്യേക ടീമിന് രൂപം നല്‍കിയിട്ടുണ്ട്. മരുന്ന് വില നിയന്ത്രണത്തില്‍ ശ്രദ്ധ കേന്ദ്രീകരിക്കാനാണ് ഇവർക്ക് നൽകിയിരിക്കുന്ന നിർദ്ദേശം.
കമ്പനികള്‍ക്കും വാണിജ്യ ലൈസന്‍സ് കാര്യങ്ങൾക്കുമായുള്ള അസിസ്റ്റന്‍റ് അണ്ടര്‍ സെക്രട്ടറിയുടെ നേതൃത്വത്തില്‍ പുതുതായി രൂപീകരിച്ച ടീമില്‍ കള്ളപ്പണം വെളുപ്പിക്കല്‍, ധനകാര്യ ഭീകരവാദ വിരുദ്ധ വകുപ്പ് ചെയര്‍മാന്‍, വാണിജ്യ നിരീക്ഷണ വകുപ്പ് ഡയറക്ടര്‍, ലൈസന്‍സ് മോണിറ്ററിംഗ് വകുപ്പ് ഡയറക്ടര്‍, ഒരു വാണിജ്യ സ്ഥാപന ഇന്‍സ്‌പെക്ടര്‍ എന്നിവരും ഉള്‍പ്പെടുന്നു.
പ്രമേഹം, കാര്‍ഡിയോളജി മരുന്നുകള്‍, മറ്റ് ഫാര്‍മസ്യൂട്ടിക്കല്‍ ഉല്‍പ്പന്നങ്ങള്‍ എന്നിവ പോലുള്ള അവശ്യ മരുന്നുകളുടെ വില അവലോകനം ചെയ്ത് ആവശ്യമായ നടപടികൾ സ്വീകരിക്കാനാണ് അവർക്ക് നൽകിയിരിക്കുന്ന നിർദ്ദേശം. വിലനിയന്ത്രണത്തിന് പുറമേ, മരുന്ന് കമ്പനികള്‍, ഫാര്‍മസികള്‍, ആരോഗ്യ മന്ത്രാലയം എന്നിവ തമ്മിലുള്ള കത്തിടപാടുകള്‍ സംഘം സൂക്ഷ്മമായി പരിശോധിക്കും. എല്ലാ ഇടപാടുകളും നിലവിലുള്ള നിയന്ത്രണങ്ങള്‍ പാലിക്കുന്നുണ്ടെന്ന് ഉറപ്പാക്കും.
കുവൈത്ത് മുനിസിപ്പാലിറ്റി, ആരോഗ്യ മന്ത്രാലയം, പബ്ലിക് അതോറിറ്റി ഫോര്‍ മാന്‍പവര്‍, സെന്‍ട്രല്‍ ബാങ്ക് ഓഫ് കുവൈത്ത്, ആഭ്യന്തര മന്ത്രാലയം എന്നിവയുള്‍പ്പെടെ ബന്ധപ്പെട്ട അധികാരികളുടെ സഹകരണത്തോടെയാണ് പരിശോധനകള്‍ നടത്തുന്നത്. മൂന്ന് മാസത്തിനകം തങ്ങളുടെ കണ്ടെത്തലുകളെക്കുറിച്ചുള്ള സമഗ്രമായ റിപ്പോര്‍ട്ട് സംഘം മന്ത്രി അല്‍ ഉമറിന് സംഘം സമര്‍പ്പിക്കുമെന്നാണ് പ്രതീക്ഷിക്കുന്നത്.
ആരോഗ്യ മന്ത്രാലയത്തിന്‍റെ മാർഗനിര്‍ദ്ദേശങ്ങള്‍ നടപ്പിലാക്കുന്നതിൽ ഫാർമസികൾ ഉൾപ്പെടെയുള്ള സ്ഥാപനങ്ങൾക്ക് ഒരു വിധത്തിലുള്ള ഇളവും അനുവദിക്കുകയില്ലെന്ന് വാണിജ്യ, വ്യവസായ മന്ത്രാലയം വ്യക്തമാക്കി. ഒരു സ്വകാര്യ ഫാര്‍മസി പ്രവര്‍ത്തിപ്പിക്കുന്നതിന് ലൈസന്‍സ് അനുവദിക്കണമെങ്കിൽ കുവൈത്തിലെ ഫാര്‍മസിസ്റ്റിന് ഈ മേഖലയില്‍ കുറഞ്ഞത് അഞ്ച് വര്‍ഷത്തെ പരിചയമുണ്ടായിരിക്കണം എന്ന കര്‍ശന നിയന്ത്രണവും ഇതില്‍ ഉള്‍പ്പെടുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല