സ്വന്തം ലേഖകൻ: സ്വയംതൊഴില്‍, മൈക്രോബിസിനസ്സുകള്‍ എന്നിവ പ്രോത്സാഹിപ്പിക്കുന്നതിന്റെ ഭാഗമായി കുവൈത്തിലെ വാണിജ്യ വ്യവസായ മന്ത്രാലയം വാണിജ്യ സ്റ്റോറുകള്‍ക്ക് ലൈസന്‍സ് നേടുന്നതിനുള്ള ആവശ്യകതകളില്‍ നിന്ന് 175 പ്രവര്‍ത്തനങ്ങളെ ഒഴിവാക്കി. ലൈസന്‍സിംഗ് പ്രക്രിയ ലളിതമാക്കിയും ചെറുകിട വ്യവസായങ്ങള്‍ക്ക് അഭിവൃദ്ധി പ്രാപിക്കാന്‍ കൂടുതല്‍ അവസരങ്ങള്‍ നല്‍കിയും സംരംഭങ്ങളെ പ്രോത്സാഹിപ്പിക്കുകയെന്ന ലക്ഷ്യത്തോടെയാണിത്.
മന്ത്രിതല പ്രമേയം 168/2024 പ്രകാരം, ഈ ഒഴിവാക്കപ്പെട്ട പ്രവര്‍ത്തനങ്ങളില്‍ ഏര്‍പ്പെടുന്ന വ്യക്തികള്‍ക്ക് വാണിജ്യ സ്റ്റോര്‍ ലൈസന്‍സ് ആവശ്യമില്ല. പകരം അവര്‍ക്ക് ഒരു സ്വയം തൊഴില്‍ ലൈസന്‍സ് ലഭിക്കും. നാല് വര്‍ഷത്തേക്ക് സാധുതയുള്ളതായിരിക്കും അത്. അപേക്ഷകര്‍ക്ക് കുറഞ്ഞത് 21 വയസ്സ് പ്രായമുണ്ടായിരിക്കണമെന്ന് വ്യവസ്ഥയുണ്ട്. ഈ സംരംഭത്തില്‍ ഏര്‍പ്പെടാന്‍ കോടതിയില്‍ നിന്ന് അനുമതി ലഭിച്ചവര്‍ക്ക് പ്രായപരിധി ബാധകമല്ല. യുവസംരംഭകര്‍ക്ക് പരമ്പരാഗത സ്റ്റോര്‍ ലൈസന്‍സിംഗ് ആവശ്യകതകളുടെ ഭാരമില്ലാതെ മൈക്രോബിസിനസ്സുകള്‍ ആരംഭിക്കാന്‍ ഇത് അവസരം നല്‍കും.
അതേസമയം, സ്വയം തൊഴില്‍ ലൈസന്‍സ് ലഭിക്കാന്‍ ചില നിബന്ധനകള്‍ പാലിക്കണമെന്ന് മന്ത്രാലയം അറിയിച്ചു. ഉടമയുടെ വിലാസം, പോസ്റ്റ് ഓഫീസ് ബോക്‌സ് അല്ലെങ്കില്‍ പബ്ലിക് അതോറിറ്റി ഫോര്‍ സിവില്‍ ഇന്‍ഫര്‍മേഷനില്‍ രജിസ്റ്റര്‍ ചെയ്ത ഇമെയില്‍ എന്നിവ നല്‍കണം. വിലാസം ഒരു സ്വകാര്യ വസതി ആണെങ്കില്‍, പ്രോപ്പര്‍ട്ടി ഉടമയുടെ അനുമതി ആവശ്യമാണ്. ലൈസന്‍സ് അപേക്ഷയോടൊപ്പം നിശ്ചിത ഫീസ് അടച്ചതിന്റെ തെളിവും അപേക്ഷയോടൊപ്പം സമര്‍പ്പിക്കണം.
അധിക ആക്റ്റിവിറ്റിക്ക് അനുമതി ലഭിക്കണമെങ്കില്‍ അത് ഫ്രീലാന്‍സുമായി ബന്ധപ്പെട്ടതോ നിലവിലുള്ള ലൈസന്‍സുള്ള പ്രവര്‍ത്തനത്തിന് സമാനമോ ആയിരിക്കണം. ഇലക്ട്രോണിക്, സോഷ്യല്‍ മീഡിയ പ്ലാറ്റ്ഫോമുകളില്‍ ലൈസന്‍സ് നമ്പര്‍ വെളിപ്പെടുത്തണം. എല്ലാ വാണിജ്യ ഇടപാടുകളും ഇലക്ട്രോണിക് പേയ്മെന്റ് രീതികളിലൂടെ മാത്രമേ നടത്താവൂ എന്നും നിബന്ധനയുണ്ട്.
മൈക്രോബിസിനസുകളെ കൂടുതല്‍ പിന്തുണയ്ക്കുന്നതിനായി, ഈ തീരുമാനത്തിന് കീഴില്‍ ലൈസന്‍സുള്ള ഫ്രീലാന്‍സ് പ്രവര്‍ത്തനങ്ങള്‍ പരിശീലിക്കുന്നതിന് ആവശ്യമായ മൂലധനം രജിസ്റ്റര്‍ ചെയ്ത കമ്പനികളിലെ സമാന പ്രവര്‍ത്തനങ്ങള്‍ക്ക് സാധാരണയായി ആവശ്യമുള്ളതിന്റെ പകുതിയായി കുറയ്ക്കാനും മന്ത്രാലയം തീരുമാനിച്ചിട്ടുണ്ട്. ഇത് കൂടുതല്‍ പേര്‍ക്ക് സ്വയം തൊഴില്‍ മേഖലയിലേക്ക് പ്രവേശിക്കാന്‍ അവസരം നല്‍കും. രാജ്യത്തിന്റെ സാമ്പത്തിക വളര്‍ച്ചയ്ക്കും വൈവിധ്യവല്‍ക്കരണത്തിനും സംഭാവന നല്‍കുന്ന മൈക്രോബിസിനസിന്റെ ഒരു പുതിയ തരംഗത്തിന് ഇത് വഴിയൊരുക്കുമെന്നാണ് വിലയിരുത്തപ്പെടുന്നത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല