സ്വന്തം ലേഖകൻ: വിദേശികള്‍ക്കായുള്ള രാജ്യത്തെ താമസ നിയമം പരിഷ്‌കരിക്കുമെന്ന് കുവൈത്ത് സര്‍ക്കാര്‍ പ്രഖ്യാപിച്ചു. 2027ഓടെ പൂര്‍ത്തീകരിക്കുന്ന 107 പ്രധാന പദ്ധതികള്‍ ഉള്‍പ്പെടുത്തി കുവൈത്ത് സര്‍ക്കാര്‍ ദേശീയ അസംബ്ലിയില്‍ സമര്‍പ്പിച്ച നാലുവര്‍ഷത്തെ കര്‍മപദ്ധതികളിലാണ് ഈ ശുപാര്‍ശ ഉള്‍ക്കൊള്ളിച്ചിരിക്കുന്നത്. പദ്ധതി നിര്‍ദേശങ്ങളിന്‍മേല്‍ നാളെ പ്രത്യേക ചര്‍ച്ച നടത്താന്‍ സ്പീക്കര്‍ എംപിമാരെ ക്ഷണിച്ചിട്ടുണ്ട്.
പ്രവാസികളുടെ താമസ നിയമം പരിഷ്‌കരിക്കാനായി പാര്‍ലമെന്റില്‍ വച്ച നിര്‍ദേശങ്ങളുടെ വിശദാംശങ്ങള്‍ പുറത്തുവന്നിട്ടില്ല. വിദേശ തൊഴിലാളികളെ ആശ്രയിക്കുന്നത് കുറയ്ക്കുക എന്ന നയത്തിന്റെ ഭാഗമായാണ് നീക്കം. കുവൈത്തിലെ 45 ലക്ഷം വരുന്ന ജനസംഖ്യയില്‍ 70 ശതമാനത്തിനടുത്ത് വിദേശികളാണ്. പൊതുമേഖലാ വേതനം പരിഷ്‌കരിക്കാനും അതേസമയം സ്വകാര്യമേഖലയില്‍ ജോലി തേടാന്‍ കുവൈത്തികളെ പ്രോത്സാഹിപ്പിക്കാനും സര്‍ക്കാര്‍ പദ്ധതിയിടുന്നുണ്ട്.
സാമ്പത്തിക, സാമൂഹിക, വിനോദ, മാനവ വിഭവശേഷി മേഖലകളെ ഉള്‍ക്കൊള്ളുന്ന 107 പ്രധാന പദ്ധതികളാണ് ദേശീയ അസംബ്ലിക്ക് മുമ്പാകെ സമര്‍പ്പിച്ചിട്ടുള്ളത്. ഗള്‍ഫ് റെയില്‍വേ പദ്ധതിയുടെ ഭാഗമായി കുവൈത്തിന്റെ ഭാഗത്തുനിന്ന് നടപ്പാക്കുന്ന നിരവധി മെഗാ പ്രോജക്ടുകള്‍ പദ്ധതികളില്‍ ഉള്‍പ്പെടുന്നു. പുതിയ കുവൈത്ത് എയര്‍പോര്‍ട്ട് ടെര്‍മിനല്‍- 2 പ്രവര്‍ത്തനവും പുതിയ മൂന്ന് റണ്‍വേകള്‍ കൂടി നിര്‍മിച്ച് കുവൈത്തിലേക്കും പുറത്തേക്കും ഉള്ള വിമാനങ്ങളുടെ എണ്ണം 240,000 ല്‍ നിന്ന് 650,000 ആയി ഉയര്‍ത്തല്‍ എന്നീ പദ്ധതികളും വിഭാവനം ചെയ്തിട്ടുണ്ട്.
മഴയില്‍ തകര്‍ന്ന ആയിരക്കണക്കിന് കിലോമീറ്റര്‍ റോഡുകള്‍ പുനര്‍നിര്‍മ്മിക്കുകയോ നന്നാക്കുകയോ ചെയ്യാനുള്ള പദ്ധതികളും ഉള്‍പ്പെടുന്നു. കുവൈത്തിലേക്ക്് വിദേശ നിക്ഷേപങ്ങള്‍ ആകര്‍ഷിക്കാനുള്ള നടപടികളുണ്ടാവും. സ്വകാര്യമേഖലയുടെ സഹകരണത്തോടെ സാമ്പത്തിക, വ്യാപാര മേഖല ശക്തിപ്പെടുത്തുകയാണ് പദ്ധതികളുടെ പ്രധാന ലക്ഷ്യമെന്ന് സര്‍ക്കാര്‍ അറിയിച്ചു.
കുവൈത്ത് സിറ്റിയുടെ പടിഞ്ഞാറ് ദോഹയില്‍ ഒരു അന്താരാഷ്ട്ര നിലവാരത്തിലുള്ള വിനോദ നഗരം (അമ്യൂസ്‌മെന്റ് പാര്‍ക്ക്) നിര്‍മിക്കുന്നത് പ്രോഗ്രാമിന് കീഴില്‍ ലിസ്റ്റുചെയ്തിരിക്കുന്ന പ്രധാന പ്രോജക്റ്റുകളില്‍ ഒന്നാണ്. 200 ദശലക്ഷം കുവൈത്ത് ദീനാര്‍ ചെലവ് കണക്കാക്കുന്നു. വിനോദസഞ്ചാര സാംസ്‌കാരിക ആകര്‍ഷണമായി ഫൈലാക ദ്വീപിനെ മാറ്റുകയും ചെയ്യും.
ബജറ്റ് ചെലവുകള്‍ക്ക് പരിധി നിശ്ചയിക്കുക, എണ്ണയെ വന്‍തോതില്‍ ആശ്രയിക്കുന്നതിനു പകരം വരുമാന സ്രോതസ്സുകള്‍ വൈവിധ്യവത്കരിക്കുക, കോര്‍പ്പറേറ്റ് നികുതി ഘടന നിശ്ചയിക്കുക, പൊതുസേവനങ്ങള്‍ക്കുള്ള തുകയും പിഴ സംഖ്യകളും വര്‍ധിപ്പിച്ച വരുമാനം കൂട്ടുക തുടങ്ങിയ സാമ്പത്തിക നിയന്ത്രണ നടപടികളും പരിഗണനയിലുണ്ട്.
കുവൈത്ത് പൗരന്മാര്‍ നേരിടുന്ന ഭവന പ്രശ്‌നം പരിഹരിക്കുന്നതിനായി 43,000 വീടുകളും സ്ഥലവും വിതരണം ചെയ്യും. 92,000 കുവൈത്ത് കുടുംബങ്ങളാണ് സര്‍ക്കാര്‍ വീടുകള്‍ക്കും ഭൂമിക്കുമായി വെയിറ്റിംഗ് ലിസ്റ്റിലുള്ളത്. ഊര്‍ജ മേഖലയില്‍, നാലാം വര്‍ഷം വരെ കുവൈത്തിന്റെ ഉല്‍പ്പാദന ശേഷി പ്രതിദിനം 2.7 ദശലക്ഷം ബാരലില്‍ നിന്ന് 3.15 ദശലക്ഷം ബിപിഡി ആയി ഉയര്‍ത്തുമെന്ന് പ്രോഗ്രാം പറയുന്നു.
ഇതേ കാലയളവില്‍, സൗജന്യ പ്രകൃതി വാതക ഉല്‍പ്പാദനം ഇപ്പോള്‍ പ്രതിദിനം 521 ദശലക്ഷം ഘന അടിയില്‍ നിന്ന് 930 ദശലക്ഷം ഘനയടിയായി ഉയര്‍ത്തുമെന്ന് സര്‍ക്കാര്‍ പ്രതീക്ഷിക്കുന്നു. പരിപാടിയുടെ ആദ്യ വര്‍ഷം നോര്‍ത്തേണ്‍ എക്‌സ്‌ക്ലൂസീവ് സോണും രണ്ടാം വര്‍ഷം അബ്ദാലി എക്‌സ്‌ക്ലൂസീവ് സോണും ആരംഭിക്കാനാണ് സര്‍ക്കാര്‍ പദ്ധതിയിടുന്നത്. രണ്ടാം വര്‍ഷത്തില്‍ നോര്‍ത്ത് ഷുഐബ പവര്‍ ജനറേഷന്‍ ആന്‍ഡ് വാട്ടര്‍ ഡിസാലിനേഷന്‍ പ്ലാന്റും സ്വകാര്യവത്കരിക്കാന്‍ പദ്ധതിയിടുന്നു. സര്‍ക്കാര്‍ പ്രാദേശിക നിക്ഷേപങ്ങള്‍ വര്‍ധിപ്പിക്കുന്നതിന്, ആഭ്യന്തര നിക്ഷേപങ്ങള്‍ക്കായി ഒരു സോവറിന്‍ ഫണ്ട് രൂപീകരിക്കാന്‍ സര്‍ക്കാര്‍ പദ്ധതിയിടുന്നു.
അതിനിടെ, കുവൈത്തില്‍ വിദേശ കമ്പനികള്‍ക്ക് പ്രവര്‍ത്തിക്കാന്‍ കുവൈത്ത് പൗരന്‍ പ്രാദേശിക ഏജന്റായി വേണമെന്ന വ്യവസ്ഥ നിര്‍ത്തലാക്കുന്ന കരട് നിയമത്തിന് അംഗീകാരം നല്‍കാന്‍ പാര്‍ലമെന്റിന്റെ സാമ്പത്തികകാര്യ സമിതി തീരുമാനിച്ചതായി എംപി അബ്ദുള്‍വഹാബ് അല്‍ഇസ പറഞ്ഞു. നിലവിലുള്ള കമ്പനികള്‍ക്ക് നിയമസാധുത തുടരും.
എന്നാല്‍ വിദേശ കമ്പനികള്‍ക്ക് അവരുടെ പ്രാദേശിക ഏജന്റുമായുള്ള കരാര്‍ റദ്ദാക്കാനും കുവൈത്ത് വിപണിയില്‍ നേരിട്ട് പ്രവര്‍ത്തിക്കാനും സ്വാതന്ത്ര്യമുണ്ടായിക്കുമെന്ന് ഇസ വിശദീകരിച്ചു. രാജ്യത്തെ സേവനങ്ങളുടെ ഗുണനിലവാരം മെച്ചപ്പെടുത്തുക, പദ്ധതികളുടെയും സേവനങ്ങളുടെയും ചെലവ് കുറയ്ക്കുക, ആഭ്യന്തര സമ്പദ്‌വ്യവസ്ഥയിലെ മത്സരം പ്രോത്സാഹിപ്പിക്കുക എന്നതാണ് ഇതിലൂടെ ലക്ഷ്യമിടുന്നത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല