സ്വന്തം ലേഖകൻ: വിവിധ തൊഴിലുകളില്‍ നിന്നും പിരിച്ചുവിട്ട തൊഴിലാളികളെ അതേ ജോലിയിലേക്ക് തിരിച്ചെടുക്കാന്‍ ഒരുങ്ങി കുവൈത്ത്. എണ്ണ മേഖലയിലെ തൊഴിലാളികളെയാണ് നിലവില്‍ കുവൈത്ത് തിരിച്ചെടുക്കുന്നത്. ഇതിനായുള്ള നിര്‍ദേശം രാജ്യം പുറപ്പെടുവിച്ചു. പിരിച്ചുവിടുന്നതിന് മുമ്പ് തൊഴിലാളി ചെയ്ത അതേ തൊഴില്‍ ഗ്രേഡും ശമ്പളവും നല്‍കി തന്നെ ആയിരിക്കും തിരിച്ചെടുക്കുക.
1969 ലെ ഓയില്‍ സെക്ടര്‍ ലേബര്‍ നിയമത്തിലെ നമ്പര്‍ 28 ലെ ഒരു ഖണ്ഡിക ഉള്‍പ്പെടുത്തികൊണ്ടാകും പുതിയ നിര്‍ദേശം ചേര്‍ക്കപ്പെടുക. പഴയ ജോലിയില്‍ നിന്നും പിരിച്ചുവിട്ടതിന് ശേഷം പുതിയ ജോലിയുമായി പൊരുത്തപ്പെടാന്‍ സാധിക്കാത്തവരെ തിരിച്ചെടുക്കും.
പഴയ ജോലിയിലേക്ക് തിരിച്ചെടുക്കാന്‍ തൊഴിലാളി പിരിച്ചുവിട്ട് അഞ്ച് വര്‍ഷത്തില്‍ അധികമാകാന്‍ പാടില്ലെന്ന് നിര്‍ദേശം വ്യവസ്ഥ ചെയ്യുന്നു. കൂടാതെ, എണ്ണ മേഖലയില്‍ ചെയ്ത ജോലിയുടെ അവസാന രണ്ട് വര്‍ഷങ്ങളില്‍ തൊഴിലാളി മോശം അല്ലെങ്കില്‍ കുറഞ്ഞ പ്രകടനം കാഴ്ച്ചവെച്ചാല്‍ തിരിച്ചെടുക്കില്ലെന്നും നിര്‍ദേശം അനുശാസിക്കുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല