സ്വന്തം ലേഖകൻ: കൊമേഴ്ഷ്യല്‍ വിസിറ്റ് വിസയില്‍ കുവൈത്തിലെത്തിയ പ്രവാസികള്‍ക്ക് അത് വര്‍ക്ക് പെര്‍മിറ്റാക്കി മാറ്റുന്നതിന് അനുവദിച്ച അവസാന തീയതി നീട്ടി. വിസിറ്റ് വിസയില്‍ എത്തിയ ശേഷം കുവൈത്തില്‍ തന്നെ കഴിയുന്നവര്‍ക്കാണ് ഈ സൗകര്യമുള്ളത്. ഇതുമായി ബന്ധപ്പെട്ട് പബ്ലിക് അതോറിറ്റി ഫോര്‍ മാന്‍പവര്‍ ഡയറക്ടര്‍ ജനറല്‍ അഹ്മദ് അല്‍ മൂസ സര്‍ക്കുലര്‍ ഇറക്കിയതായി അല്‍ റായ് പത്രം റിപ്പോര്‍ട്ട് ചെയ്തു. വിസിറ്റ് വിസ വര്‍ക്ക് പെര്‍മിറ്റിലേക്ക് മാറ്റാനുള്ള സമയം അടുത്ത മാസം 31 വരെയാണ് നീട്ടിയിരിക്കുന്നത്.
ആഭ്യന്തര മന്ത്രാലയവുമായി സഹകരിച്ചാണ് കൊമേഴ്ഷ്യല്‍ വിസിറ്റ് വിസയിലെത്തുന്നവര്‍ക്ക് അത് തൊഴില്‍ വിസയാക്കി മാറ്റാന്‍ അനുമതി നല്‍കുന്നതിനുള്ള നടപടി സ്വീകരിച്ചതെന്നും അദ്ദേഹം വ്യക്തമാക്കി. ഇതിന് കൊറോണ എമര്‍ജന്‍സികള്‍ക്കായുള്ള മിനിസ്റ്റീരിയല്‍ കമ്മിറ്റിയുടെ അനുമതി വേണം. അതേസമയം, 2021 നവംബര്‍ 11നു മുമ്പ് ഇഷ്യൂ ചെയ്ത കമേഴ്സ്യല്‍ വിസിറ്റ് വിസകളില്‍ എത്തിയവര്‍ക്കു മാത്രമേ ഈ ആനുകൂല്യം ലഭിക്കുകയുള്ളൂവെന്ന് മാന്‍പവര്‍ അതോറിറ്റി അറിയിച്ചു. പബ്ലിക് അതോറിറ്റി ഓഫ് മാന്‍ പവറിന്റെ വെബ്സൈറ്റ് വഴി ഇതിന് അപേക്ഷ നല്‍കാം.
മന്ത്രാലയത്തിന്‍റെ എംപ്ലോയ്മെന്റ് അഫയേഴ്സ് വിഭാഗം, ഇന്‍ഫര്‍മേഷന്‍ സെന്റര്‍ സിസ്റ്റം വിഭാഗം എന്നിവയ്ക്ക് ഇതുമായി ബന്ധപ്പെട്ട നിര്‍ദ്ദേശങ്ങള്‍ നല്‍കിയതായും അദ്ദേം വ്യക്തമാക്കി. രാജ്യത്തെ തൊഴില്‍ കമ്പോളത്തിലെ തൊഴിലാളി ക്ഷാമം പരിഹരിക്കുന്നതിനുള്ള വഴിയെന്ന രീതിയിലാണ് സന്ദര്‍ശക വിസയിലെത്തുന്നവര്‍ക്ക് രാജ്യത്ത് വച്ചു തന്നെ തൊഴില്‍ വിസയിലേക്ക് മാറാന്‍ അനുമതി നല്‍കുന്നതെന്നും അദ്ദേഹം അറിയിച്ചു.
ഏതെങ്കിലും രീതിയിലുള്ള ബിസിനസ് പ്രവര്‍ത്തനങ്ങള്‍ക്കായി കുവൈത്തിലെത്തുന്നവര്‍ക്ക് ബന്ധപ്പെട്ട കുവൈത്ത് എംബസികളില്‍ നിന്നോ കോണ്‍സുലേറ്റുകളില്‍ നിന്നോ ലഭിക്കുന്നതാണ് കൊമേഴ്ഷ്യല്‍ വിസിറ്റ് വിസ. ബിസിനസ് വിസിറ്റര്‍ വിസ എന്ന പേരിലും ഇത് അറിയപ്പെടാറുണ്ട്. ജിസിസി രാജ്യങ്ങള്‍ക്കു പുറത്തുള്ളവര്‍ക്കാണ് ഈ വിസ ആവശ്യമുള്ളത്. കോവിഡ് മഹാമാരിയെ തുടര്‍ന്ന് പതിനായിരക്കണക്കിന് പ്രവാസികള്‍ കുവൈത്തില്‍ നിന്ന് സ്വന്തം നാടുകളിലേക്ക് മടങ്ങിയിരുന്നു. വിസ കാലാവധി കഴിഞ്ഞത് ഉള്‍പ്പെടെയുള്ള കാരണങ്ങളാല്‍ അവര്‍ക്ക് കുവൈത്തിലേക്ക് തിരികെയെത്താന്‍ സാധിച്ചിരുന്നില്ല. ഇത് തൊഴില്‍ മേഖലയില്‍ വലിയ പ്രതിസന്ധിക്ക് കാരണമായിരുന്നു. ഇതിന്റെ പശ്ചാത്തലത്തിലാണ് പുതിയ വിസ മാറ്റത്തിനുള്ള അനുമതിയുമായി അധികൃതര്‍ രംഗത്തെത്തിയിരിക്കുന്നത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല