![](http://www.nrimalayalee.com/wp-content/uploads/2024/07/Screenshot-2024-07-12-170420-640x429.png)
സ്വന്തം ലേഖകൻ: രാജ്യത്തെ നഴ്സറികളുടെ കാര്യക്ഷമത ഉറപ്പുവരുത്തുന്നതിനും അവയുടെ മികവ് വര്ധിപ്പിക്കുന്നതിനും പുതിയ നിബന്ധനകള് മുന്നോട്ടുവച്ച് ഖത്തര് വിദ്യാഭ്യാസ മന്ത്രാലയം. നഴ്സറികളെ വിവിധ വിഭാഗങ്ങളായി തിരിക്കുകയും അവിടങ്ങളിലെ ജീവനക്കാര്ക്ക് യോഗ്യതകളും അനുഭവപരിചയവും നിശ്ചയിക്കുകയും നഴ്സറിയില് ഉണ്ടായിരിക്കേണ്ട സൗകര്യങ്ങള് വ്യക്താക്കുകയും ചെയ്യുന്നതാണ് പുതിയ വ്യവസ്ഥകള്. അതോടൊപ്പം നഴ്സറികള് സ്ഥാപിക്കുന്നതിനുള്ള ലൈസന്സ് ഫീസും അത് പുതുക്കുന്നതിനുള്ള ഫീസും നിര്ണയിക്കുകയും ചെയ്തു.
ചെറുപ്രായത്തില് തന്നെ കുട്ടികള്ക്ക് മികച്ച പരിചരണവും ഗുണനിലവാരമുള്ള പരിശീലനവും നല്കേണ്ടതിന്റെ പ്രാധാന്യം ഉള്ക്കൊണ്ടുകൊണ്ടാണ് ഇത്തരമൊരു നീക്കമെന്ന് ഖത്തര് വിദ്യാഭ്യാസ-ഉന്നത വിദ്യാഭ്യാസ മന്ത്രാലയത്തിലെ സ്വകാര്യ വിദ്യാഭ്യാസ കാര്യങ്ങളുടെ അസിസ്റ്റന്റ് അണ്ടര്സെക്രട്ടറി ഒമര് അല് നാമ പറഞ്ഞു. ഇതിന് നഴ്സറികളുടെ ഗുണനിലവാരം ഉറപ്പാക്കേണ്ടത് അനിവാര്യമാണ്.
കുട്ടികളെ വിദ്യാഭ്യാസപരമായും മാനസികമായും ഒരുക്കുന്നതിന് അനുയോജ്യമായ അന്തരീക്ഷം പ്രദാനം ചെയ്യാന് നഴ്സറികള്ക്ക് സാധിക്കണമെന്നും ഇതേക്കുറിച്ച് കുടുംബങ്ങള്ക്കിടയില് ശക്തമായ അവബോധം നല്കേണ്ടതുണ്ടെന്നും അദ്ദേഹം അഭിപ്രായപ്പെട്ടു. കുട്ടികളുടെ കാര്യത്തിൽ ഒരു വിട്ടുവീഴ്ചയ്ക്കും ഖത്തർ തയ്യാറല്ല എന്നതാണ് ഇതിലൂടെ ലക്ഷ്യം വെക്കുന്നത്.
പുതിയ മന്ത്രിതല തീരുമാനപ്രകാരം നഴ്സറികളെ മൂന്ന് വിഭാഗമായാണ് തിരിച്ചിരിക്കുന്നത്. അതിലൊന്ന് ഡേ കെയര് നഴ്സറികളാണ്. ജോലി ചെയ്യുന്ന മാതാപിതാക്കളുടെ ആവശ്യങ്ങള് നിറവേറ്റുന്നതിനായി ശിശുസംരക്ഷണ സേവനങ്ങള് നല്കുന്നതില് വൈദഗ്ദ്ധ്യമുള്ള നഴ്സറികളായിരിക്കും ഇത്. കെയര് ആന്റ് എജുക്കേഷന് നഴ്സറികളാണ് രണ്ടാമത്തെ വിഭാഗം.
ഇവിടെ കുട്ടികള്ക്ക് ഡേ കെയര് സേവനങ്ങള് നല്കുന്നതിനൊപ്പം അവരില് ഭാഷ, വായന, എഴുത്ത്, ഗണിതശാസ്ത്രം തുടങ്ങിയ അടിസ്ഥാന കഴിവുകള് വികസിപ്പിക്കാനും സൗകര്യമുണ്ടായിരിക്കും. ഭിന്നശേഷിക്കാരായ വിദ്യാര്ഥികളെ ലക്ഷ്യമിട്ടുള്ള സ്പെഷ്യലൈസ്ഡ് നഴ്സറികളാണ് മൂന്നാമത്തെ വിഭാഗം. ഇവരുടെ കഴിവുകള് വികസിപ്പിക്കുന്നതിന് ആധുനിക ഉപകരണങ്ങളും രീതിശാസ്ത്രങ്ങളും ഉപയോഗിക്കുന്നതിന് ഇവിടെ സംവിധാനമൊരുക്കും.
നഴ്സറികളിലെ അധ്യാപകര് ബന്ധപ്പെട്ട മേഖലകളില് പ്രത്യേക പരിശീലനം ലഭിച്ചവരും യോഗ്യതയുള്ളവരും ആയിരിക്കണമെന്നും നിബന്ധനയുണ്ട്. അതോടൊപ്പം കുട്ടികളുടെ ശാരീരിക മാനസിക സന്തോഷത്തിനും സുരക്ഷയ്ക്കും അവരുടെ കഴിവുകളുടെ വികാസനത്തിനും ആവശ്യമായ അന്തരീക്ഷം നഴ്സറിയില് ഒരുക്കണമെന്നും നിര്ദ്ദേശമുണ്ട്. നഴ്സറി ലൈസന്സ് എടുക്കുന്നതിനും അത് പുതുക്കുന്നതിനുമുള്ള ഫീസ് 1,000 ഖത്തര് റിയാലായി നിശ്ചയിച്ചിട്ടുണ്ട്. നിലവിലുള്ള നഴ്സറികള്ക്ക് പുതിയ നിബന്ധനകള് നടപ്പിലാക്കുന്നതിന് ആറ് മാസത്തെ സമയം നല്കുമെന്നും മന്ത്രാലയം അറിയിച്ചു.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല