സാബു ചുണ്ടക്കാട്ടില്‍: മാര്‍ ജോര്‍ജ് ആലഞ്ചേരിയും മാര്‍.ജോസഫ് ശ്രാമ്പിക്കലും നാളെ മാഞ്ചസ്റ്ററില്‍: വിപുലമായ സ്വീകരണം ഒരുക്കി വിശ്വാസ സമൂഹം. യുകെയില്‍ സിറോ മലബാര്‍ മക്കള്‍ക്കായി രൂപത ആരംഭിച്ച ശേഷം സഭാമക്കളെ നേരില്‍ കാണുന്നതിനായി യുകെയില്‍ എത്തുന്ന സിറോ മലബാര്‍ സഭയുടെ തലവന്‍ കര്‍ദിനാള്‍ മാര്‍.ജോര്‍ജ് ആലഞ്ചേരിക്കും,ഗ്രേറ്റ് ബ്രിട്ടണ്‍ രൂപതയുടെ മെത്രാന്‍ മാര്‍.ജോസഫ് ശ്രാമ്പിക്കലിനും നാളെ മാഞ്ചെസ്‌റ്റെറില്‍ സ്വീകരണം നല്‍കുന്നു.
വിഥിന്‍ഷോ സെന്റ് ആന്റണീസ് ദേവാലയത്തില്‍ ഉച്ചക്ക് 1.30 മുതലാണ് സ്വീകരണ പരിപാടികള്‍.
ഷ്രൂഷ്ബറി,സാല്‍ഫോര്‍ഡ്,ലിവര്‍പൂള്‍ രൂപതകളില്‍ നിന്നുള്ള വിശ്വാസികളാണ് നാളെ മാഞ്ചസ്റ്ററില്‍ ഒത്തുചേര്‍ന്ന് അഭിവന്ദ്യ പിതാക്കന്മാരെ വരവേല്‍ക്കുക.
ഉച്ചക്ക് 1.30 ന് എത്തിച്ചേരുന്ന അഭിവന്ദ്യ മാര്‍ ജോര്‍ജ് ആലഞ്ചേരി പിതാവിനെയും,ഗ്രേറ്റ് ബ്രിട്ടന്‍ രൂപതയുടെ തലവന്‍ മാര്‍ ജോസഫ് ശ്രാമ്പിക്കല്‍ പിതാവിനെയും,മറ്റ് വൈദീക ശ്രേഷ്ടരെയും മാതൃവേദി പ്രവര്‍ത്തകര്‍ മുത്തുക്കുടകളുടെ അകമ്പടിയോടെ സ്വീകരിച്ചു് സെന്റ് ആന്റണീസ് ദേവാലയത്തിലേക്ക് ആനയിക്കും.ഇതേതുടര്‍ന്ന് നടക്കുന്ന ദിവ്യബലില്‍ മാര്‍.ജോര്‍ജ് ആലഞ്ചേരി മുഖ്യ കാര്‍മികത്വം വഹിക്കും,ഒട്ടേറെ വൈദീകര്‍ സഹകാര്‍മികരാകും.
റോമില്‍ നടന്ന മാര്‍.സ്റ്റീഫന്‍ ചിറപ്പണത്തിന്റെ മെത്രാഭിഷേകത്തിന് ശേഷം നാട്ടിലേക്കുള്ള മടക്കയാത്രയില്‍ ആണ് മാര്‍.ആലഞ്ചേരി യുകെ സന്ദര്‍ശനത്തിന് വീണ്ടും എത്തുന്നത്.ഇക്കുറിയുള്ള വരവില്‍ യുകെയുടെ പല ഭാഗങ്ങളിലൂടെ കടന്നുപോയി ദിവ്യബലി അര്‍പ്പിക്കുകയും വിശ്വാസികളുമായി കൂടിക്കാഴ്ച നടത്തുകയും ചെയ്യുന്നുണ്ട്.മാഞ്ചസ്റ്ററില്‍ നടക്കുന്ന സ്വീകരണത്തെത്തുടര്‍ന്ന് അന്ന് തന്നെ സ്‌റ്റോക്ക് ഓണ്‍ ട്രെന്റിലും നടക്കുന്ന സ്വീകരണ പരിപാടിയില്‍ അഭിവന്ദ്യ പിതാക്കന്മാര്‍ പങ്കെടുക്കും.
സിറോ മലബാര്‍ ചാപ്ലിന്‍മാരായ റെവ.ഡോ.ലോനപ്പന്‍ അരങ്ങാശേരി,ഫാ.ജിനോ അരീക്കാട്ട്.ഫാ.തോമസ് തൈക്കൂട്ടത്തില്‍,ക്‌നാനായ ചാപ്ലിന്‍ ഫാ.സജി മലയില്‍പുത്തന്‍പുര എന്നിവരുടെ നേതൃത്വത്തിലാണ് മാഞ്ചസ്റ്ററിലെ സ്വീകരണ പരിപാടികള്‍ നടക്കുന്നത്.
കരുണയുടെ വര്‍ഷാവസാനത്തില്‍ ലഭിച്ചിരിക്കുന്ന ഇ ദൈവ കൃപയില്‍ പങ്കെടുത്ത് അനുഗ്രഹങ്ങള്‍ പ്രാപിക്കുവാന്‍ ഏവരെയും ഷ്രൂഷ്ബറി രൂപതാ സിറോമലബാര്‍ ചാപ്ലിന്‍ റെവ.ഡോ.ലോനപ്പന്‍ അരങ്ങാശേരി സ്വാഗതം ചെയ്യുന്നു.
പള്ളിയുടെ വിലാസം
St.Antonys Church
Port way, Wythenshawe.
Manchester
M22 0WR
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല