പോൺ ഹബ്ബിൽ കണക്ക് പഠിപ്പിച്ച് ഒരു അദ്ധ്യാപകൻ; വാർഷിക വരുമാനം രണ്ട് കോടിയിലേറെ

സ്വന്തം ലേഖകൻ: പോൺഹബ്ബുകൾ വഴി കണക്ക് പഠിപ്പിച്ച് കോടികൾ സമ്പാദിച്ച് ഗണിതശാസ്ത്ര അദ്ധ്യാപകൻ. തായ്‌വാനിലെ 34കാരനായ ഗണിത ശാസ്ത്ര അദ്ധ്യാപകൻ ചാങ്ഷുവാണ് ഈ വേറിട്ട വഴിയിലൂടെ വർഷം തോറും കോടികൾ സമ്പാദിച്ച് കൂട്ടുന്നത്. പത്ത് ലക്ഷത്തിലധികം കാഴ്ചക്കാരാണ് ചാങ്ഷുവിന്റെ വീഡിയോയ്‌ക്ക് ഉള്ളത്. പ്രതിവർഷം രണ്ട് കോടിയിലധികം രൂപയാണ് പോൺഹബ്ബിലെ ഗണിതശാസ്ത്ര ക്ലാസുകളിൽ നിന്നും ഇയാൾക്ക് ലഭിക്കുന്നത്.

changshumath666 എന്ന വെരിഫൈഡ് അക്കൗണ്ടിൽ നിന്നാണ് ചാങ്ഷു തന്റെ വീഡിയോകൾ പോസ്റ്റ് ചെയ്യുന്നത്. തന്റെ കണക്ക് ക്ലാസുകൾ പ്രദർശിപ്പിക്കുന്നതിനായി മറ്റ് ചില പോൺ സൈറ്റുകളേയും ചാങ്ഷു സമീപിച്ചെങ്കിലും, അവരൊന്നും ഈ ശ്രമത്തെ പിന്തുണച്ചില്ല. മുതിർന്ന ആളുകൾക്കുള്ളതല്ലാത്ത വീഡിയോകൾ തങ്ങളുടെ സൈറ്റിൽ പ്രദർശിപ്പിക്കില്ലെന്നായിരുന്നു അവരുടെ വാദം.

എന്നാൽ പോൺ ഹബ്ബുകൾക്ക് അത്തരത്തിലൊരു നിയമമില്ലെന്നും, അതിന്റെ ഉപയോക്താക്കൾക്കും കണക്ക് പഠിക്കാൻ ആഗ്രഹമുണ്ടെന്നുമാണ് ചാങ്ഷു പറയുന്നത്. പോൺ ഹബ്ബുകളിൽ ഗണിതശാസ്ത്ര ക്ലാസുകൾ പോസ്റ്റ് ചെയ്യുമ്പോൾ അത് കൂടുതൽ ആളുകളിലേക്ക് എത്തുന്നു. അതുകൊണ്ട് തന്നെ തന്റെ വീഡിയോയ്‌ക്ക് ധാരാളം കാഴ്ചക്കാരുണ്ടെന്നും ചാങ്ഷു പറയുന്നു.

കണക്ക് സംബന്ധമായ എല്ലാ കാര്യങ്ങളും ചാങ്ഷു ഇതിൽ പഠിപ്പിക്കുന്നുണ്ട്. വ്യത്യസ്ത മാർഗങ്ങളിലൂടെ ഓരോന്നിനും ഉത്തരം കണ്ടുപിടിക്കുന്നതും ചാങ്ഷു വിശദീകരിക്കുന്നു. മാൻഡറിൻ ഭാഷയിലാണ് ക്ലാസുകൾ എടുക്കുന്നത്.

“ചിലപ്പോൾ ആളുകൾക്ക് എന്റെ വീഡിയോകളിൽ താൽപ്പര്യമില്ലായിരിക്കാം, പക്ഷേ അഡൽറ്റ് വീഡിയോ പ്ലാറ്റ്ഫോമിൽ കണക്ക് പഠിപ്പിക്കുന്ന ഒരു അദ്ധ്യാപകനുണ്ടെന്ന് അവർക്കെല്ലാം അറിയാം,” ചാങ്ഷു കൂട്ടിച്ചേർത്തു.

മറ്റ് ചിലർ പോൺ ഹബ്ബിൽ കണക്ക് ക്ലാസ് എടുക്കുന്നു എന്ന കൗതുകത്തിന്റെ പുറത്താണ് വീഡിയോകൾ കാണുന്നത്. പോൺഹബ്ബുകളിലെ തന്റെ വീഡിയോകൾ കൂടുതൽ ആളുകൾ കാണണമെന്ന് ആഗ്രഹിക്കുന്നുണ്ടെങ്കിലും, അശ്ലീല സൈറ്റുകളിലെ കണക്ക് പഠിപ്പിക്കൽ അത്ര താത്പര്യമുള്ള കാര്യമല്ലെന്നും ചാങ്ഷു പറയുന്നുണ്ട്.

”പോൺഹബ്ബിൽ കണക്ക് പഠിപ്പിക്കാൻ ഞാൻ ആഗ്രഹിച്ചിരുന്നില്ല. ഞാൻ തായ്വാനിൽ നിന്നുള്ള ഒരു അദ്ധ്യാപകനാണെന്നും കണക്ക് നന്നായി പഠിപ്പിക്കുമെന്നും ലോകം അറിയണം. അതിനാണ് ഈ മാർഗ്ഗം സ്വീകരിച്ചത്,“ ചാങ്ഷു പറയുന്നു.

എന്നാൽ പോൺഹബ്ബുകളിൽ മാത്രമല്ല ചാങ്ഷുവിന്റെ ഗണിതശാസ്ത്ര വീഡിയോകൾ കാണാനാകുന്നത്. ഇൻസ്റ്റാഗ്രാമിലും യൂട്യൂബിലും ചാങ്ഷു തന്റെ ക്ലാസിന്റെ വീഡിയോകൾ പോസ്റ്റ് ചെയ്യുന്നുണ്ട്.