`പോയി പോയി നമ്മുടെ വിശ്വാസങ്ങളും രീതികളും എങ്ങോട്ടാണ്, പോകുന്നത്? തീര്‍ച്ചയായും പത്തൊന്‍പതാം നോറ്റാണ്ടിലോ, ഇരുപതാം നൂറ്റാണ്ടിലോ അല്ല ഇന്ന് സമൂഹം, അനുനിമിഷം വികസിക്കപ്പെടുന്ന ഹൈടെക് നൂറ്റാണ്ടിലാണ്. ഇപ്പോഴത്തെ സമൂഹത്തിന്, ഒരുപാട് കെട്ടുപാടുകളോ, ബന്ധനങ്ങളോ ഇല്ല, അല്ലെങ്കില്‍ അവര്‍ അതൊന്നും ആഗ്രഹിക്കുന്നുമില്ല. കേരളത്തില്‍ സദാചാരപോലീസ് വ്യാപകമാകുന്നതോടെ സാധാരണക്കാര്‍ക്കു പുറത്തിറങ്ങിനടക്കാനാകാത്ത അവസ്ഥയാകുന്നു. ഈയടുത്ത് സദാചാരപോലീസിംഗിന് ഇരയായവരുടെ എണ്ണം കൂടിക്കൂടിവരികയാണ്. പെരുമ്പാവൂരിനടുത്ത് ബസ്സില്‍വച്ച് പട്ടാപ്പകല്‍ പോക്കറ്റടി ആരോപിച്ച് ഒരു യുവാവിനെ തല്ലിക്കൊന്നിട്ട് ദിവസങ്ങളേ ആയിട്ടുള്ളൂ. അതിനിടെ, കോഴിക്കോട് മുക്കത്ത് സദാചാരപോലീസിംഗിന് ഇരയായി നാലുദിവസമായി അത്യാസന്നനിലയില്‍ ആശുപത്രിയില്‍ കഴിഞ്ഞിരുന്ന ഷഹീദ് ബാവ എന്ന ചെറുപ്പക്കാരന്‍ മരിച്ച വാര്‍ത്തയാണു പുറത്തുവരുന്നത്.
അവിഹിതബന്ധമാരോപിച്ചാണ് നാട്ടുകാര്‍ ചേര്‍ന്ന് ഈ യുവാവിനെ തല്ലിച്ചതച്ചത്. ഗള്‍ഫില്‍ ജോലി ചെയ്യുന്ന ഇയാള്‍ തന്റെ കാമുകിയെ കാണാന്‍ രാത്രിയില്‍ ഒരു വീടിനു സമീപമെത്തിയെന്നാരോപിച്ചാണ് നാട്ടുകാര്‍ ചേര്‍ന്ന് ഇയാളെ പോസ്റ്റില്‍ കെട്ടിയിട്ടു തല്ലിയത്. തലയ്ക്കു ഗുരുതരമായി പരിക്കേറ്റ ഇയാളെ ബന്ധുക്കളെത്തി അപേക്ഷിച്ചിട്ടും വിട്ടുകൊടുക്കാതെ മര്‍ദ്ദനം തുടര്‍ന്നു. ഒടുവില്‍ പോലീസെത്തിയാണ് സദാചാരപോലീസില്‍ നിന്ന് ഇയാളെ രക്ഷിച്ച് ആശുപത്രിയിലാക്കിയത്. അതേസമയം, കൊല്ലപ്പെട്ട ബാവയ്ക്ക് അവിഹിതബന്ധമൊന്നുമില്ലായിരുന്നെന്നും ബാവയുമായി വ്യക്തിപരമായ ശത്രുതയുള്ള ചിലര്‍ അയാളെ ആ സ്ഥലത്തെത്തിച്ച് ഇല്ലാക്കുറ്റമാരോപിച്ച് മര്‍ദ്ദിച്ച് കൊല്ലുകയായിരുന്നെന്നുമാണ് ബന്ധുക്കള്‍ പറയുന്നത്. സംഭവത്തെ സംബന്ധിച്ച് കേസെടുത്തിട്ടുണ്ടെന്നും പോലീസ് അറിയിക്കുന്നു.
ബാവയ്ക്ക് അവിഹിതബന്ധമുണ്ടോ ഇല്ലയോ എന്നതല്ല ഇവിടെ ചര്‍ച്ചാവിഷയമാകേണ്ടത്.
അവിഹിതബന്ധമുണ്ടായാലും ഇല്ലെങ്കിലും ഒരു വീട്ടില്‍ രാത്രി വരികയോ പോകുകയോ ചെയ്യുന്നത് ആ വീട്ടിലുള്ളവരുടെ അറിവോടെയും സമ്മതത്തോടെയുമാണെങ്കില്‍ നാട്ടുകാര്‍ക്ക് എന്തു കേടാണ് എന്ന ചോദ്യമാണ്. കൊച്ചിയില്‍ രാത്രിസമയത്ത് പുരുഷസുഹൃത്തുമായി ബൈക്കില്‍ യാത്ര ചെയ്ത തസ്നി ബാനു എന്ന പെണ്‍കുട്ടിയെ സദാചാരപോലീസ് മുഖത്തടിച്ച സംഭവം വിവാദമായിട്ടും അധികകാലമായിട്ടില്ല. ചുറ്റും നടക്കുന്നത് കാണാനാണ്, ദൈവം കണ്ണ്, തന്നിരിക്കുന്നത്, അതില്‍ തൊട്ടടുത്ത് ഒരു നേരത്തെ ഭക്ഷണത്തിനായി കരയുന്ന പിഞ്ചു കുഞ്ഞുണ്ടാകാം, മാനത്തിനായി നിലവിളിയ്ക്കുന്ന പെണ്‍കുട്ടികളുണ്ടാകാം,നിരാലംബരായി വഴിയില്‍ ഉപേക്ഷിക്കപ്പെടുന്ന അമ്മമാരുണ്ടാകാം.അവരെയൊന്നും കാണാത്ത സമൂഹനീതിബോധം ഒരു യുവതിയ്ക്കു നേരേ ഉയര്‍ന്നുവെങ്കില്‍ എന്താണ്, അതിന്‍റെ പിന്നിലെ താല്‍പ്പര്യം? രാത്രിയില്‍ ഒറ്റയ്ക്ക് പോയിരുന്നുവെങ്കില്‍ അ പെണ്‍കുട്ടി നേരിടേണ്ടിയിരുന്നത് ഇതിലുമെത്രയോ വലുതയിരുന്നേനേ, ഒരുപക്ഷെ ഈ നീതിബോധം കാട്ടിയ മാന്യന്‍മാര്‍ പോലും അവളെ വലിച്ചുകീറാന്‍ ഉത്സാഹിച്ചേനെ.
ഇത്തരം സംഭവങ്ങള്‍ ജനങ്ങളില്‍ കനത്ത ഭീതിയാണു നിറയ്ക്കുന്നതെന്നറിയുമ്പോഴും അധികൃതരുടെ ഭാഗത്തുനിന്നു നടപടികളുണ്ടാകുന്നില്ല. ഇത്തരം സംഭവങ്ങളോടും ചിന്താഗതികളോടും പോരാടേണ്ട സാംസ്കാരികനിലവാരത്തിലേക്ക് മലയാളിയെ എത്തിക്കേണ്ട ധാര്‍മികത ഏറ്റെടുക്കാന്‍ ഇടതുപക്ഷത്തിനും ആകുന്നില്ല. കാരണം, അവര്‍ തന്നെയാണ് രാജ്മോഹന്‍ ഉണ്ണിത്താന്റെയും അബ്ദുള്ളക്കുട്ടിയുടെയും അവിഹിതബന്ധം കണ്ടുപിടിക്കാന്‍ കണ്ണിലെണ്ണയുമൊഴിച്ച്, ചൂട്ടും കത്തിച്ച് കാത്തിരുന്നത്. അതുകൊണ്ട് അവര്‍ക്ക് സദാചാരപോലീസിംഗിന്റെ ഇത്തരം നടപടികള്‍ക്കെതിരെ സംസാരിക്കാന്‍ അവകാശം നഷ്ടപ്പെട്ട നിലയാണ്. യുഡിഎഫിന്റെ സ്ഥിതിയും മറിച്ചല്ല പീഡന വീരന്മാരെ സംരക്ഷിക്കുന്ന ഒരു സംഘടന മാത്രമായിരിക്കുന്നു അത്.
സ്വയം കളഞ്ഞുകുളിച്ച ഈ തിരുത്തല്‍ പദവിയുടെ നഷ്ടബോധത്തിലാണ് അതേ കാപട്യത്തിന്റെ ഇരയാകുമെന്ന ഭീതിയില്‍ ഡിവൈഎഫ്ഐയുടെ സംസ്ഥാനസെക്രട്ടറി ടി വി രാജേഷ് ഒരു വാവിട്ട ആരോപണത്തില്‍ പതറി ടെലിവിഷന്‍ ക്യാമറകള്‍ക്കു മുന്നില്‍ അച്ഛനേയും അമ്മയേയും ഭാര്യയേയും ചൊല്ലിക്കരഞ്ഞതു. കഴിഞ്ഞൊരു ദിവസം കാണിക്കവഞ്ചി ഇടിച്ചുതകര്‍ത്ത കാറില്‍ സീരിയല്‍ നടിക്കൊപ്പമുണ്ടായിരുന്ന എംഎല്‍എയും മുന്‍ എംഎല്‍എയും ആരെന്ന ചുഴിഞ്ഞുനോട്ടം സമൂഹത്തില്‍ നിന്നുണ്ടാവുന്നതിനും കാരണം വേറൊന്നുമല്ല. സ്വന്തം ഭാര്യയെ കാറോടിക്കാന്‍ പഠിപ്പിച്ച കുറ്റത്തിന് സദാചാരപ്പൊലീസിന്റെ കൈക്കരുത്തിനിരയായ കോട്ടയം ഒളശ്ശയിലെ അഡ്വ. വിനു ജേക്കബിന്റെ അനുഭവവും ഓര്‍ക്കാം.
ആഗോളവല്‍കരണം സൃഷ്ടിക്കുന്ന അരാജകത്വത്തില്‍ തകര്‍ന്ന ആഫ്രിക്കന്‍ – ലാറ്റിന്‍ അമേരിക്കന്‍ രാജ്യങ്ങളുടെ സ്ഥിതിയാണ് ഇന്ത്യയെയും കാത്തിരിക്കുന്നതെന്ന് പണ്ടുതന്നെ നക്സലൈറ്റുകള്‍ മുന്നറിയിപ്പു തന്നിരുന്നതോര്‍ക്കേണ്ട സാഹചര്യമാണിത്
. സാമ്പത്തികമായ തകര്‍ച്ചയും കുത്തിക്കവര്‍ച്ചയും മാത്രമല്ല, സദാചാരപരമായ ഇരട്ടമനസ്സ് ആഴത്തില്‍ കൊണ്ടുനടക്കുന്ന മലയാളിസമൂഹം പോലെയുള്ള ഇടുങ്ങിയ ഇടങ്ങളില്‍ അത് ഇത്തരം സാംസ്കാരികപ്രശ്നമായും വളരുമെന്നത് പട്ടാപ്പകല്‍ പോലെ വ്യക്തമായിക്കൊണ്ടിരിക്കുകയാണ്.
സ്ത്രീ ഇപ്പൊഴും അടുക്കളയില്‍ തന്നെ തളച്ചിടപ്പെടേണ്ടതാണെന്ന അബദ്ധധാരണ ഇപ്പൊഴും പലര്‍ക്കും ഉണ്ട്. അവള്‍ക്കു മാത്രം അവര്‍ ചട്ടക്കൂടുകള്‍ പണിഞ്ഞു കൊടുക്കുന്നു, അടുക്കളയില്‍ നിന്ന് അവള്‍ അരങ്ങത്തേയ്ക്കിരങ്ങിയാല്‍ പിന്നെ സ്ത്രീയ്ക്കു ചുറ്റുമായി അവരുടെ കണ്ണുകള്‍, സംശയത്തിന്‍റെ മുള്‍മുനയില്‍ നിര്‍ത്തിയും കാമക്കണ്ണുകളുമായും പുരുഷന്‍മാരുടെ പീഡനങ്ങള്‍ മുറയ്ക്കു നടക്കും. ഇവിടെയെല്ലാം വേലിക്കെട്ടുകള്‍ എപ്പോഴും സ്ത്രീയ്ക്കു ചുറ്റുമാണ്. പുരുഷന്, ഇതില്‍ നിന്നെല്ലാം സ്വതന്ത്രനായി അവന്‍റെ സ്വാതന്ത്ര്യം ആഘോഷിക്കാം.സ്ത്രീയെ ഒരു ഉപഭോഗവസ്തു മാത്രമാക്കുമ്പോഴാണ്, അവളുടെ അവകാശങ്ങളേയും സ്വാതന്ത്ര്യത്തേയും എതിര്‍ക്കാന്‍ പുരുഷന് തയ്യാറാവുക. ഇന്ന് പുരുഷനൊപ്പം തന്നെ ജോലി ചെയ്യുനുണ്ട് സ്ത്രീയും, അവന്‍ ചെയ്യുന്ന ഏതു ജോലിയും അതിലും ഭംഗിയായി ചെയ്യാനും അവള്‍ക്ക് കഴിയുന്നുണ്ട്. എന്നിരുന്നാലും സ്വന്തം ലൈംഗികാഭിനിവേശത്തെ ഉണര്‍ത്തുന്ന വെറുമൊരു ഉപകരണമായി സ്ത്രീത്വത്തെ കാണുന്ന പുരുഷന്‍മാര്‍ ഉള്ള കാലത്തോളം അവളുടെ ജീവിതം ഇനിയും ഇരുട്ടറകളില്‍ തുടരും.
![`nón¸v A`nam\IcsaóXv kn]nF½nsâ am{Xw \ne]mSv : tZim`n-am\n¡v P\bpK¯neq-sS adp]-Sn](https://www.nrimalayalee.com/wp-content/uploads/2014/10/news71-380x250.jpg "`nón¸v A`nam\IcsaóXv kn]nF½nsâ am{Xw \ne]mSv : tZim`n-am\n¡v P\bpK¯neq-sS adp]-Sn")
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല