സ്വന്തം ലേഖകന്‍: ബിഗ് ബിയായി മമ്മൂട്ടി; കാലില്‍ തൊട്ട് അനുഗ്രഹം വാങ്ങി പേളിയും ശ്രീനിയും; പേളിഷ് വിവാഹ ചിത്രങ്ങള്‍ കാണാം. ടെലിവിഷന്‍ അവതാരകയും നടിയുമായ പേളി മാണിയുടെയും നടന്‍ ശ്രീനിഷ് അരവിന്ദിന്റെയും വിവാഹമായിരുന്നു കഴിഞ്ഞ ദിവസം. ചൊവ്വര പള്ളിയില്‍ നടന്ന വിവാഹ ചടങ്ങുകള്‍ക്ക് ശേഷം എറണാകുളം സിയാല്‍ കണ്‍വെന്‍ഷന്‍ സെന്ററില്‍ വെച്ചാണ് വിവാഹസത്കാരം നടന്നത്.
കടുംനീല സ്ലീവ്‌ലെസ് ഫ്രോക്കും നെറ്റ് ദുപ്പട്ടയും അണിഞ്ഞാണ് പേളി റിസപ്ഷനെത്തിയത്. കടുംനീല കുര്‍ത്തയും ധോത്തി പാന്റുമായിരുന്നു ശ്രീനിഷിന്റെ വേഷം. വിവാഹത്തിന് മമ്മൂട്ടിയും സിദ്ദിഖുമടക്കമുള്ള സിനിമാ താരങ്ങള്‍ എത്തിയിരുന്നു. പുതിയ ചിത്രമായ ബിലാലിന്റെ ചിത്രീകരണം നടക്കുന്നതിനാല്‍ താടി നീട്ടി ബിലാല്‍ ജോണ്‍ കുരിശ്ശിങ്കലിന്റെ ലുക്കിലാണ് മമ്മൂട്ടി എത്തിയത്. വേദിയില്‍ നിന്ന് ഫോട്ടോ എടുത്തതിന് ശേഷം പേളിയും ശ്രീനിഷും മമ്മൂട്ടിയുടെ കാലില്‍ തൊട്ട് അനുഗ്രഹം വാങ്ങി. നവദമ്പതികള്‍ക്ക് ആശംസകള്‍ നേര്‍ന്നാണ് മമ്മൂട്ടി മടങ്ങിയത്.
സിനിമാ താരങ്ങള്‍ക്ക് പുറമേ ബിഗ് ബോസ് റിയാലിറ്റി ഷോ താരങ്ങളായ ഷിയാസ് കരീം, ഹിമ ശങ്കര്‍, അരിസ്റ്റോ സുരേഷ് തുടങ്ങിയവര്‍ ചടങ്ങില്‍ സംബന്ധിക്കാനെത്തിയിരുന്നു. മലയാളം റിയാലിറ്റി ഷോ ആയ ബിഗ് ബോസിന്റെ സെറ്റില്‍ വെച്ചാണ് പേളിയും ശ്രീനിഷും പ്രണയത്തിലാകുന്നത്. ബിഗ് ബോസ് സെറ്റില്‍ വെച്ച് പരസ്പരം പ്രണയം തുറന്നുപറഞ്ഞ ഇവര്‍ എന്നു വിവാഹിതരാകുമെന്ന് കാത്തിരിക്കുകയായിരുന്നു ആരാധകര്‍. റിയാലിറ്റി ഷോ സെറ്റിലും അതിനു ശേഷവും ഏറെ ആഘോഷിക്കപ്പെട്ട പ്രണയമായിരുന്നു ഇരുവരുടെയും. പ്രണയം സത്യമാണോ എന്നു സംശയങ്ങളും ഗോസിപ്പുകളും പ്രചരിച്ചിരുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല