സ്വന്തം ലേഖകൻ: നവംബര്‍ 20-ന് ആരംഭിക്കുന്ന ഫിഫ ലോകകപ്പിനായി ഖത്തറിലെത്തുന്ന ഫുട്‌ബോള്‍ ആരാധകര്‍ക്കായി സംഘാടകര്‍ ഒരുക്കിവച്ചിരിക്കുന്ന വിസ്മയകരമായ കാഴ്ചകളെയും വിനോദ പരിപാടികളെയും കുറിച്ച് ഗൈഡ് പുറത്തറക്കി ഫിഫ ഇന്റര്‍നാഷണല്‍ ഫുട്‌ബോള്‍ അസോസിയേഷന്‍. ആരാധകര്‍ സന്ദര്‍ശിക്കേണ്ട നഗരങ്ങള്‍, പ്രധാന കേന്ദ്രങ്ങള്‍, വിവിധ സംഗീത, വിനോദ പരിപാടികള്‍, ഷോപ്പിംഗ് കേന്ദ്രങ്ങള്‍ തുടങ്ങിയ വിവരങ്ങള്‍ ഉള്‍പ്പെടുത്തിയിട്ടുള്ള ഒരു ടൂറിസ്റ്റ് ഗൈഡാണ് ഫിഫ അതിന്റെ ഔദ്യോഗിക വെബ്സൈറ്റില്‍ പ്രസിദ്ധീകരിച്ചത്.
ഫിഫ ലോകകപ്പ് ഫുട്‌ബോള്‍ ആരാധകര്‍ക്കായി വിപുലമായ സൗകര്യങ്ങളാണ് ഗള്‍ഫ് രാജ്യം ഒരുക്കിയിരിക്കുന്നതെന്ന് ഫിഫ ഗൈഡില്‍ പറയുന്നു. ഭാവിയുടെ നഗരങ്ങള്‍, മരുഭൂമിയിലെ സാഹസികതകള്‍, ഷോപ്പിംഗിനുള്ള അനന്തമായ അവസരങ്ങള്‍ എന്നിവ ആസ്വദിക്കാനുള്ള മികച്ച സന്ദര്‍ഭമാണ് ആരാധകര്‍ക്ക് കൈവന്നിരിക്കുന്നത്. സന്ദര്‍ശകരായ പൊതുജനങ്ങള്‍ക്ക് വിനോദസഞ്ചാര യാത്രകള്‍, പ്രാദേശിക ജീവിതത്തിന്റെ എല്ലാ വശങ്ങളും ഉള്‍ക്കൊള്ളുന്ന പ്രകൃതി ടൂറുകള്‍ തുടങ്ങി ഓരുരുത്തരും ആഗ്രഹിക്കുന്നതെല്ലാം ഖത്തര്‍ വാഗ്ദാനം ചെയ്യുന്നുണ്ട്. അത്രമേല്‍ വൈവിധ്യമാര്‍ന്ന പരിപാടികളാണ് സംഘാടകര്‍ സംന്ദര്‍ശകര്‍ക്കായി ലോകകപ്പ് വേളയില്‍ ആസൂത്രണം ചെയ്തിരിക്കുന്നതെന്നും ഫിഫ വ്യക്തമാക്കി.
ലോകകപ്പ് വേളയില്‍ ഖത്തര്‍ സന്ദര്‍ശിക്കുമ്പോള്‍ ആരാധകര്‍ക്ക് അഞ്ച് കാര്യങ്ങള്‍ പ്രതീക്ഷിക്കാമെന്ന് ഫിഫ ഗൈഡ് വിശദീകരിക്കുന്നു. അതില്‍ ആദ്യത്തേത് ഖത്തറിന്റെ ഊഷ്മളമായ സ്വീകരണവും ആതിഥ്യമര്യാദയുമാണ്. ഖത്തര്‍ നിവാസികള്‍ അവരുടെ ആതിഥ്യമര്യാദയ്ക്ക് പേരുകേട്ടവരും പരമ്പരാഗതമായി അതിഥികളുമായി ഭക്ഷണം പങ്കിടുന്നവരുമാണ്. ഖത്തരി സമൂഹത്തില്‍ വേരൂന്നിയിരിക്കുന്ന ഈ പാരമ്പര്യം ജീവിതത്തിന്റെ എല്ലാ മേഖലകളിലും ഇന്നും പ്രകടമാണ്- ഫിഫ ഗൈഡ് വ്യക്തമാക്കി. അതിഥികള്‍ക്ക് അറബിക് കോഫിയും മധുരപലഹാരങ്ങളും നല്‍കുന്നത് ആതിഥ്യമര്യാദയുടെ ഒരു പ്രകടനമായി ഖത്തരികള്‍ ഇപ്പോഴും തുടരുന്ന രീതിയാണ്. ഇന്ത്യന്‍ ഉപഭൂഖണ്ഡം, ഇറാന്‍, സിറിയ, വടക്കേ ആഫ്രിക്ക എന്നിവിടങ്ങളിലെ പലഹാരങ്ങളുടെ സ്വാധീനം ഖത്തറിലെ സമ്പന്നവും അതുല്യവുമായ ഖത്തറി ഭക്ഷണവിഭവങ്ഹളില്‍ പ്രകടമാണെന്നും ഫിഫ പറയുന്നു.
ഖത്തറില്‍ ധാരാളമായുള്ള റിസോര്‍ട്ടുകളും ബീച്ചുകളുമാണ് മറ്റൊരു മുഖ്യ ആകര്‍ഷണമായി ഫിഫയുടെ ടൂറിസ്റ്റ് ഗൈഡില്‍ അടയാളപ്പെടുത്തിയിരിക്കുന്നത്. തലസ്ഥാനമായ ദോഹയ്ക്ക് സമീപമുള്ള ഏറ്റവും മികച്ച തീരപ്രദേശങ്ങളിലൊന്നായ സീലൈന്‍ ബീച്ച് റിസോര്‍ട്ട്, കടല്‍ത്തീരത്തുള്ള അല്‍ ഗരിയ റിസോര്‍ട്ട്, നീണ്ടുകിടക്കുന്ന ദോഹ കോര്‍ണിഷ് തുടങ്ങിയവ അവയില്‍ പ്രധാനമാണ്. സന്ദര്‍ശകര്‍ക്ക് വിശ്രമിക്കാനും ഉല്ലസിക്കാനും പറ്റിയ ഇതിനേക്കാള്‍ മനോഹരമായ മറ്റ് സ്ഥലങ്ങള്‍ കുറവായിരിക്കും. കോര്‍ണിഷിലെ കിലോമീറ്റര്‍ നീണ്ടുകിടക്കുന്ന നടപ്പാതയുള്‍പ്പെടെ ബീച്ചുകളില്‍ വ്യായാമത്തിനും ജോഗിംഗിനും ഉള്‍പ്പെടെ നിരവധി സൗകര്യങ്ങളും ലഭ്യമാണെന്നും ഗൈഡ് പറയുന്നു.
ഫിഫ അതിന്റെ ഗൈഡില്‍ എടുത്തുകാണിച്ച മൂന്നാമത്തെ വ്യതിരിക്തമായ കാര്യം ഖത്തറിലെ ദ്വീപുകളും ജല കായിക വിനോദങ്ങളുമാണ്. ഭൂമിശാസ്ത്രപരമായ സ്ഥാനം, സമ്പന്നമായ സമുദ്രജീവികള്‍, തെളിഞ്ഞ ജലം എന്നിവയാല്‍ ജല കായിക പ്രേമികള്‍ക്ക് അനുയോജ്യമായ സ്ഥലമാണ് ഖത്തര്‍. ഖത്തറിലെ ചരിത്രപ്രാധാന്യമുള്ള സ്ഥലങ്ങള്‍, കോട്ടകള്‍ എന്നിവയെ കുറിച്ചും ഗൈഡ് പ്രതിപാദിക്കുന്നുണ്ട്. പുരാവസ്തുക്കളെയും ചരിത്രത്തെയും സ്‌നേഹിക്കുന്നവര്‍ക്ക് ഖത്തറില്‍ഭൂതകാലത്തിന്റെ കഥ പറയുന്ന നിരവധി ചരിത്ര സ്ഥലങ്ങള്‍ കണ്ടെത്താനാകും. ഖത്തറിലെ പ്രധാനപ്പെട്ട നാലാമത്തെ കാര്യമായി ഇവയെയാണ് ഗൈഡില്‍ ഉയര്‍ത്തിക്കാട്ടിയിരിക്കുന്നത്.
ഖത്തറില്‍ സന്ദര്‍ശകരെ കാത്തിരിക്കുന്ന അഞ്ചാമത്തെ വ്‌സമയം മരുഭൂമിയിലെയും മണല്‍ക്കുന്നുകളിലെയും സാഹസികതയാണ്. മനോഹരമായ ബീച്ചുകള്‍ക്കും ദ്വീപുകള്‍ക്കും പുറമേ, മനോഹരമായ മരുഭൂമിയും പാറക്കെട്ടുകളും ഖത്തറിനുണ്ട്. സന്ദര്‍ശകര്‍ക്ക് ഡെസേര്‍ട്ട് സഫാരി, ഒട്ടക സവാരി, നക്ഷത്രങ്ങള്‍ക്ക് കീഴിലെ മരുഭൂ ക്യാമ്പിംഗ് എന്നിവ അധികൃതര്‍ ഒരുക്കിയിട്ടുണ്ട്. പഴയ കാലത്തെ അറബികളുടെ കൂടാരങ്ങളുടെ മാതൃകയിലാണ് ആധുനിക സൗകര്യങ്ങളോടെയുള്ള ടെന്റുകള്‍ ഒരുക്കിയിരിക്കുന്നത്. മനോഹരമായ മണല്‍ക്കുന്നുകളുടെ നാടായ ഖോര്‍ അല്‍ അദൈദ് പ്രദേശം ഇവയില്‍ പ്രധാനമാണ്. ചരിത്രാതീത കാലത്തെ കൊത്തുപണികളാല്‍ നിറഞ്ഞ പാറകള്‍ നിറഞ്ഞുനില്‍ക്കുന്ന അല്‍ ജസാസിയ്യ പ്രദേശമാണ് ഖത്തറില്‍ കണ്ടിരിക്കേണ്ട മറ്റൊരു സ്ഥലമെന്നും ഗൈഡില്‍ പറയുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല