സ്വന്തം ലേഖകൻ: കളിക്കാനും വിനോദ സഞ്ചാര കേന്ദ്രങ്ങളും മറ്റും സന്ദര്‍ശിക്കാനും കുട്ടികള്‍ കൂടുതല്‍ സമയം കണ്ടെത്തുന്ന സമയമായതിനാല്‍ അവധിക്കാലത്ത് കുട്ടികള്‍ അപകടത്തില്‍ പെടുന്ന കേസുകള്‍ വലിയ തോതില്‍ വര്‍ധിക്കാറുണ്ടെന്ന് മുന്നറിയിപ്പ് നല്‍കുകയാണ് ഖത്തറിലെ സിദ്ര മെഡിസിനിലെ എമര്‍ജന്‍സി മെഡിസിന്‍ എജ്യുക്കേഷന്‍ വിഭാഗം ചീഫും സീനിയര്‍ അറ്റന്‍ഡിംഗ് ഫിസിഷ്യനുമായ ഡോ. ബാര്‍ബറ ബ്ലാക്കി.
വാഹന അപകടങ്ങള്‍ക്കു പുറമെ, വെള്ളത്തില്‍ മുങ്ങല്‍, വാതിലുകളില്‍ വിരലുകള്‍ കുടുങ്ങല്‍, ഉയര്‍ന്ന സ്ഥലങ്ങളില്‍ നിന്ന് താഴേക്ക് വീഴല്‍ തുടങ്ങിയ അപകടങ്ങളാണ് സിദ്ര മെഡിസിനിലെ എമര്‍ജന്‍സി മെഡിസിന്‍ വിഭാഗത്തില്‍ അവധിക്കാലത്ത് കൂടുതലായി എത്താറുള്ള കേസുകളെന്ന് അവര്‍ പറഞ്ഞു. കുട്ടികള്‍ നീന്തല്‍ക്കുളങ്ങള്‍, കടല്‍, മറ്റ് ജലസ്രോതസ്സുകള്‍ എന്നിവയ്ക്ക് സമീപമാകുമ്പോള്‍ കൂടെയുള്ളവര്‍ അതീവ ജാഗ്രത പാലിക്കണമെന്ന് അവര്‍ നിര്‍ദ്ദേശിച്ചു.
കുട്ടികള്‍ വെള്ളത്തിന് ചുറ്റും സുരക്ഷിതരാണെന്ന് ഉറപ്പാക്കാനുള്ള ഏറ്റവും ലളിതമായ മാര്‍ഗം കൃത്യമായ മേല്‍നോട്ടമാണ്. പ്രത്യേകിച്ചും നീന്താന്‍ അറിയാവുന്ന ഒരു വ്യക്തിയുടെ മേല്‍നോട്ടത്തിലായിരിക്കണം അവര്‍. നീന്താന്‍ അറിയാത്ത കുട്ടികള്‍ വെള്ളത്തിലിറങ്ങുമ്പോള്‍ ലൈഫ് ജാക്കറ്റുകളോ വ്യക്തിഗത ഫ്‌ലോട്ടേഷന്‍ എയ്ഡുകളോ ഉപയോഗിക്കണമെന്നും ഡോക്ടര്‍ ബ്ലാക്കി പറഞ്ഞു. കുട്ടികള്‍ നീന്തല്‍ക്കുളങ്ങള്‍ക്ക് സമീപം കളിക്കാന്‍ പോകുമ്പോഴും അവര്‍ക്കു മേല്‍ മാതാപിതാക്കളുടെ ഒരു കണ്ണുണ്ടാവണം.
വീട്ടില്‍ വച്ച് കുട്ടികള്‍ക്ക് പരിക്കുകള്‍ ഏല്‍ക്കുന്നത് ഒഴിവാക്കാന്‍ ഒരുപാട് കാര്യങ്ങള്‍ ചെയ്യാനാകുമെന്ന് അവര്‍ ഉപദേശിച്ചു. ശരിയായ സുരക്ഷാ നടപടികള്‍ സ്വീകരിച്ചില്ലെങ്കില്‍, ശിശുക്കള്‍ക്കും കുട്ടികള്‍ക്കും വീട് അപകടകരമായ സ്ഥലമായി മാറുമെന്ന തിരിച്ചറിവുണ്ടാകണം. കുട്ടികള്‍ കളിക്കുന്ന സ്ഥലത്ത് വയറുകളും കളിപ്പാട്ടങ്ങളും പോലെയുള്ള വസ്തുക്കള്‍ ഇല്ലെന്ന് ഉറപ്പുവരുത്തണം. അടുപ്പുകള്‍, ഓവന്‍, കത്തിച്ച മെഴുകുതിരി, വെള്ളം തിളപ്പിക്കുന്ന കെറ്റില്‍, പാത്രങ്ങള്‍ എന്നിവ പോലുള്ളവയില്‍ നിന്ന് കുട്ടികളെ അകറ്റി നിര്‍ത്തുക. മരുന്നുകള്‍, വിഷപദാര്‍ങ്ങള്‍, ശുചീകരണ സാമഗ്രികള്‍ തുടങ്ങിയവ കുട്ടികള്‍ക്ക് എത്താത്ത ഇടങ്ങളില്‍ സൂക്ഷിക്കണം.
കുട്ടികളില്‍ സാധാരണ കണ്ടുവരുന്ന പരിക്കാണ് വാതിലുകളിലും വാതിലുകളുടെ കൊളുത്തുകളിലും വിരലുകള്‍ കുടുങ്ങിയുണ്ടാവുന്ന ചതവുകളും മുറിവുകളും. വീടിന്റെയും വാഹനത്തിന്റെയും വാതിലുകള്‍ അടയ്ക്കുന്നതിന് മുമ്പ് കുട്ടികളുടെ കൈകള്‍ സുരക്ഷിതമാണെന്ന് ഉറപ്പുവരുത്തണം. വാതിലുകള്‍ കൊണ്ട് കളിക്കരുതെന്ന് കുട്ടികളെ പഠിപ്പിക്കുകയും വേണം. കൂടാതെ ഫിംഗര്‍ പ്രൊട്ടക്ഡ് സ്ട്രിപ്പുകളും ഡോര്‍ ഗാര്‍ഡുകളും ഉപയോഗിക്കുന്നതും ഈ അപകടം കുറയ്ക്കാന്‍ സഹായിക്കുമെന്നും ഡോ. ബ്ലാക്കി പറഞ്ഞു.
അവധിക്കാലത്ത് ഓള്‍-ടെറൈന്‍ വാഹനങ്ങള്‍ (എടിവി) ഉപയോഗിച്ച് സമയം ചെലവഴിക്കാന്‍ പദ്ധതിയിടുന്നവര്‍, ഈ വാഹനങ്ങള്‍ ഒരു യാത്രക്കാരനുവേണ്ടി മാത്രം രൂപകല്‍പ്പന ചെയ്തിരിക്കുന്നതാണെന്ന് ഓര്‍ക്കണം. 16 വയസ്സിന് താഴെയുള്ള കുട്ടികള്‍ എടിവികള്‍ ഓടിക്കരുത്. സുരക്ഷിതമായി എടിവി പ്രവര്‍ത്തിപ്പിക്കുന്നതിന് മതിയായ ശക്തിയും പരിശീലനവും പരിചയവുമുള്ള ഒരു ഡ്രൈവര്‍ ആവശ്യമാണെന്നും ഡോ. ബ്ലാക്കി ഓര്‍മിപ്പിച്ചു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല