സ്വന്തം ലേഖകൻ: ഖത്തറിലെത്തിയ സന്ദര്‍ശകരുടെ എണ്ണത്തില്‍ 2022 നവംബറില്‍ വന്‍ വര്‍ധനവ്. 2021 ലെ അതേ കാലയളവിനെ അപേക്ഷിച്ച് 430.3 ശതമാനത്തിന്റെ വര്‍ധനവാണ് കഴിഞ്ഞ നവംബറില്‍ രേഖപ്പെടുത്തിയത്. 2022 ഒക്ടോബറിനെ അപേക്ഷിച്ച് 229.5 ശതമാനത്തിന്റെ വര്‍ധനവും രേഖപ്പെടുത്തിയതായി ‘ഖത്തര്‍; പ്ലാനിംഗ് ആന്‍ഡ് സ്റ്റാറ്റിസ്റ്റിക്‌സ് അതോറിറ്റി പുറത്തിറക്കിയ പ്രതിമാസ സ്ഥിതിവിവരക്കണക്ക് ബുള്ളറ്റിന്‍ വ്യക്തമാക്കി.
ഖത്തറിലേക്ക് ഏറ്റവും കൂടുതല്‍ സന്ദര്‍ശകര്‍ എത്തിയത് അമേരിക്കയില്‍ നിന്നാണ്. ആകെ സന്ദര്‍ശകരുടെ നാലിലൊന്നോളം അമേരിക്കയില്‍ നിന്നെത്തിയവരാണ്. അതായത് 23 ശതമാനം. അമേരിക്ക കഴിഞ്ഞാല്‍ ജിസിസി രാജ്യങ്ങളില്‍ നിന്നുള്ളവര്‍ 22 ശതമാനം വരും. രാജ്യത്ത് എത്തിയവരില്‍ 85 ശതമാനം പേരും വിമാനത്താവളം വഴിയാണ് എത്തിയിരിക്കുന്നതെന്നും കണക്കുകള്‍ വ്യക്തമാക്കുന്നു. രാജ്യത്തെ ട്രാഫിക് ലംഘനങ്ങള്‍ വലിയ തോതില്‍ കുറഞ്ഞു എന്നതാണ് റിപ്പോര്‍ട്ടിലെ മറ്റൊരു പ്രധാന കണ്ടെത്തല്‍.
2022 ഒക്ടോബറുമായി താരതമ്യം ചെയ്യുമ്പോള്‍ നവംബറില്‍ ട്രാഫിക് ലംഘനങ്ങളുടെ പ്രതിമാസ നിരക്കില്‍ 41.9 ശതമാനം കുറവാണ് രേഖപ്പെടുത്തിയത്. സ്പീഡ് റഡാര്‍ ലംഘനങ്ങളുടെ നിരക്കിലാണ് ഏറ്റവും കൂടുതല്‍ കുറവ് കൈവരിച്ചു. മുന്‍ മാസത്തെ അപേക്ഷിച്ച് നവംബറില്‍ 48.2 ശതമാനത്തിന്റെ കുറവാണ് ഇക്കാര്യത്തില്‍ രേഖപ്പെടുത്തിയത്. 2022 നവംബറില്‍ രജിസ്റ്റര്‍ ചെയ്ത പുതിയ വാഹനങ്ങളുടെ എണ്ണം 9423 ആണ്.
ഇത് ഒക്ടോബറിനെ അപേക്ഷിച്ച് 22.8 ശതമാനം കുറവാണെങ്കിലും വാര്‍ഷിക ശതമാനം വച്ച് നോക്കുമ്പോള്‍ കൂടുതലാണ്. കഴിഞ്ഞ വര്‍ഷം നവംബറിനെ അപേക്ഷിച്ച് 36.9 ശതമാനം കൂടുതലാണിത്. 2022 നവംബറില്‍ മൊത്തം 866 പേര്‍ക്ക് ട്രാഫിക് അപകടങ്ങളില്‍ പരിക്കേല്‍ക്കുകയുണ്ടായി. ഒക്ടോബറിനെ അപേക്ഷിച്ച് ഇത് 1.6 കുറവും വാര്‍ഷികാടിസ്ഥാനത്തില്‍ 21.3 ശതമാനം കൂടുതലുമാണ്. ഇവയില്‍ 92 ശതമാനം പരിക്കുകളും നിസ്സാര പരിക്കുകളായിരുന്നു. ആറ് ശതമാനം പരിക്കുകള്‍ ഗുരുതരമായിരുന്നു.
2022 ഒക്ടോബറിനെ അപേക്ഷിച്ച് നവംബറില്‍ മൊത്തം വിവാഹ കരാറുകളുടെയും മൊത്തം വിവാഹമോചനങ്ങളുടെയും എണ്ണത്തിലും കുറവുണ്ടായി. വിവാഹങ്ങളില്‍ 25.9 ശതാനം കുറവുണ്ടായപ്പോള്‍ വിവാഹ മോചനങ്ങള്‍ 54.5 ശതമാനമാണ് കുറഞ്ഞത്. മൊത്തം വിവാഹ കരാറുകളുടെ എണ്ണം 260ഉം വിവാഹമോചന സര്‍ട്ടിഫിക്കറ്റുകളുടെ എണ്ണം 95 ആയിരുന്നു.
2022 നവംബറില്‍ സാമൂഹ്യ സുരക്ഷാ പദ്ധതികളാലായി 77 മില്യണ്‍ റിയാല്‍ വിതരണം ചെയ്തു. 14074 ഗുണഭോക്താക്കള്‍ക്കാണ് ഇത്രയും തുക നല്‍കിയത്. സാമൂഹിക സുരക്ഷാ തുകയുടെ മൂല്യത്തില്‍ 1.6 ശതമാനവും ഗുണഭോക്താക്കളുടെ എണ്ണത്തില്‍ 0.7 ശതമാനവും പ്രതിമാസ വര്‍ദ്ധനവുണ്ടായി.
2022 നവംബറില്‍ 2436 ജനനങ്ങളാണ് ഖത്തറില്‍ പുതുതായി രജിസ്റ്റര്‍ ചെയ്തതെന്നും റിപ്പോര്‍ട്ട് വ്യക്തമാക്കി. ഇത് മുന്‍ മാസത്തെ അപേക്ഷിച്ച് 5.8 ശതമാനം കുറവാണ്. ഇതേ കാലയളവില്‍ 226 മരണങ്ങള്‍ രേഖപ്പെടുത്തി. ഒക്ടോബറിനെ അപേക്ഷിച്ച് 2.3 ശതമാനം കൂടുതല്‍. നവംബറില്‍ ആകെ 645 പുതിയ കെട്ടിട പെര്‍മിറ്റുകളാണ് നല്‍കിയത്. ഇതില്‍ പ്രതിമാസം 33.6 ശതമാനം കുറവും 19.6 ശതമാനം വാര്‍ഷിക കുറവും രേഖപ്പെടുത്തി. നവംബറിലെ രാജ്യത്തെ മൊത്തം വൈദ്യുതി ഉപഭോഗം 3079.8 ഗിഗാവാട്ട് ആയിരുന്നു. പ്രതിമാസ നിരക്കില്‍ 19.4 ശതമാനവും വാര്‍ഷിക നിരക്കില്‍ 13.1 ശതമാനവും കുറവാണിത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല