സ്വന്തം ലേഖകന്‍: യെമനിലെ ഹൂതി വിമതര്‍ തൊടുത്ത ബാലിസ്റ്റിക് മിസൈല്‍ തകര്‍ത്തതായി സൗദി, വിമതര്‍ തിരക്കേറിയ സൗദി നഗരങ്ങള്‍ ഉന്നമിടുന്നത് തലവേദനയാകുന്നു. ദക്ഷിണ സൗദിയിലെ ഖമീസ് മുശൈത് ലക്ഷ്യമാക്കി യെമനില്‍ നിന്ന് തൊടുത്ത ബാലിസ്റ്റിക് മിസൈല്‍ സൗദിയുടെ വ്യോമ പ്രതിരോധ സംവിധാനത്തില്‍ തട്ടി തകര്‍ന്നു വീണതായി യെമനില്‍ നിയമാനുസൃത സര്‍ക്കാരിനെ പുനരവരോധിക്കാനുള്ള നീക്കങ്ങളില്‍ പങ്കാളികളായ അറബ് സഖ്യസേനയുടെ ഔദ്യോഗിക വക്താവ് തുര്‍ക്കി അല്‍മാലിക്കി വെളിപ്പെടുത്തി.
വ്യാഴാഴ്ച രാത്രിയായിരുന്നു സംഭവം. യെമനിലെ ഹൂതി കലാപകാരികളുടെ മിസൈലിന് യാതൊരു നാശനഷ്ടവും ഉണ്ടാക്കാന്‍ സാധിച്ചില്ലെന്നും അദ്ദേഹം വ്യക്തമാക്കി. വ്യാഴാഴ്ച്ച ദക്ഷിണ സൗദിയിലെ മറ്റൊരു നഗരമായ ജിസാന്‍ പ്രദേശത്ത് നടത്തിയ നുഴഞ്ഞുകയറ്റ ശ്രമം സൗദി സൈന്യം തകര്‍ത്തിരുന്നു. ജീസാനിലെ അല്‍ഖൂബായ്ക്ക് നേരെയായിരുന്നു ഹൂതികളുടെ ആക്രമണ ശ്രമം. ഹൂതികളുടെ നീക്കം സൗദി സേന തകര്‍ത്തിരുന്നു.
നിരവധി യെമനി കലാപകാരികളെ വധിക്കുകയും റോക്കറ്റുകള്‍ ഉള്‍പ്പെടെ വലിയ ആയുധ ശേഖരം പിടിച്ചെടുക്കുകയോ നശിപ്പിക്കുകയോ ചെയ്തിട്ടുണ്ട്. നവംബര്‍ നാലിന് ഹൂതികള്‍ തൊടുത്ത ബാലിസ്റ്റിക് മിസൈല്‍ സൗദി തലസ്ഥാനമായ റിയാദില്‍ പതിച്ചത് വ്യാപക പ്രതിഷേധത്തിന് വഴി വെച്ചിരുന്നു. ഹൂതികള്‍ ആയുധങ്ങള്‍ കൈവശം വെക്കുന്നത് മേഖലയിലെയും ലോകത്തിന്റെയും സമാധാനത്തിനും സുരക്ഷയ്ക്കും ഭീഷണിയാണെന്ന് അറബ് സഖ്യസേനാ വക്താവ് ചൂണ്ടിക്കാട്ടി.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല