സ്വന്തം ലേഖകൻ: ടൂറിസം മേഖലയിലെ സ്വദേശി ജീവനക്കാരുടെ പ്രാതിനിധ്യം കൂടുതൽ ശക്തിപ്പെടുത്താനുള്ള നീക്കവുമായി സൗദി അറേബ്യ. രാജ്യത്തെ ടൂറിസം രംഗത്ത് പ്രവർത്തിക്കുന്ന വിവിധ സ്ഥാപനങ്ങളിൽ ജോലി ചെയ്യുന്നതിനായി 100,000 സൗദി യുവാക്കളെയും യുവതികളെയും പരിശീലിപ്പിക്കാന്‍ മന്ത്രാലയം പ്രതിവര്‍ഷം 10 കോടി ഡോളര്‍ ചെലവഴിക്കുമെന്ന് ടൂറിസം മന്ത്രി അഹമ്മദ് അല്‍ ഖത്തീബ് അറിയിച്ചു.
ബുധനാഴ്ച റിയാദില്‍ നടന്ന ലോക്കല്‍ കണ്ടന്റ് ഫോറത്തില്‍ ‘വിഷന്‍ 2030 ന്റെ വെളിച്ചത്തില്‍ പ്രാദേശിക ഉള്ളടക്കത്തിനായുള്ള ഭാവി പ്രവണതകള്‍’ എന്ന വിഷയത്തില്‍ നടന്ന ഡയലോഗ് സെഷനില്‍ പങ്കെടുത്ത് സംസാരിക്കുകയായിരുന്നു മന്ത്രി. രാജ്യത്തിൻ്റെ സമ്പദ് വ്യവസ്ഥയിലും ടൂറിസം തൊഴിലുകളുടെ പ്രാദേശികവല്‍ക്കരണത്തിലും ഈ മേഖലയുടെ സംഭാവന 2030ഓടെ 10 ശതമാനമായി ഉയര്‍ത്തുകയാണ് ഇതിലൂടെ മന്ത്രാലയം ലക്ഷ്യമിടുന്നതെന്നും അദ്ദേഹം പറഞ്ഞു.
ഹോട്ടലുകളുടെയും ട്രാവല്‍ ആന്‍ഡ് ടൂറിസം കമ്പനികളുടെയും മാനേജ്മെന്റിലും പ്രവര്‍ത്തനത്തിലും സൗദി ജീവനക്കാരെ നിയമിച്ചുകൊണ്ട് ഈ മേഖലയിലെ തൊഴിലുകൾ പ്രാദേശികവല്‍ക്കരിക്കാനുള്ള മന്ത്രാലയത്തിൻ്റെ പദ്ധതിയുടെ ഭാഗമാണിത്. ചില ഹോട്ടലുകളില്‍ സൗദി ജീവനക്കാരുടെ നിരക്ക് നിലവിൽ 50 ശതമാനത്തിൽ എത്തിയിട്ടുണ്ട്.’
ഹോട്ടലുകളിലെയും ടൂറിസം റിസോര്‍ട്ടുകളിലെയും ചില സാദി ഓപ്പറേറ്റര്‍മാര്‍ അവർക്ക് ഈ മേഖലയിൽ പരിശീലനം ആവശ്യമാണെന്ന ആവശ്യം ഉന്നയിച്ചതിനെ തുടർന്നാണ് ഒരു ലക്ഷം പേർക്ക് വിദഗ്ധ പരിശീലനത്തിന് പദ്ധതി മാറാക്കിയതെന്നും മന്ത്രി പറഞ്ഞു. എണ്‍പതുകളില്‍ രാജ്യം അതിൻ്റെ സാമ്പത്തിക മേഖല കെട്ടിപ്പടുത്തത് പോലെ ടൂറിസം മേഖലയിലും അത് ആവർത്തിക്കും. ഇക്കാര്യത്തിൽ സ്വകാര്യമേഖലയുമായി സഹകരിച്ചും അവരെ പങ്കാളികളാക്കിയും മുന്നോട്ടു പോകുമെന്നും അദ്ദേഹം പറഞ്ഞു.
ഈ സുപ്രധാന മേഖലയില്‍ മൂലധന ചെലവിന്റെ വലിയൊരു ഭാഗം പ്രാദേശികവല്‍ക്കരിക്കാന്‍ മന്ത്രാലയം പ്രവര്‍ത്തിച്ചു വരികയാണെന്ന് അല്‍ ഖത്തീബ് അറിയിച്ചു. ഇതു പ്രകാരം സൗദി ഓഫീസുകള്‍ മുഖേന മേഖലയിൽ ആശയവല്‍ക്കരണം നടത്തും. സൗദി കരാര്‍ കമ്പനികള്‍ മുഖേന ഈ പദ്ധതികൾ നടപ്പിലാക്കുന്നത് സൗദിയിലെ ഫാക്ടറികളിൽ ഉൽപ്പാദിപ്പിക്കുന്ന അസംസ്കൃത വസ്തുക്കൾ ഉപയോഗിച്ചായിരിക്കുമെന്നും അദ്ദേഹം അറിയിച്ചു.
മൂലധനത്തിൻ്റെ പ്രാദേശികവല്‍ക്കരണം പൗരൻമാർക്ക് ടൂറിസം മേഖലയിൽ കൂടുതൽ തൊഴിലവസരങ്ങള്‍ നൽകാൻ സഹായിക്കും. മൊത്ത ആഭ്യന്തര ഉല്‍പ്പാദനത്തില്‍ (ജിഡിപി) ഈ മേഖലയുടെ സംഭാവന വര്‍ധിപ്പിക്കാനും ഇതുവഴി സാധിക്കുമെന്നും അദ്ദേഹം പറഞ്ഞു.
ടൂറിസം മേഖല ദേശീയ സമ്പദ് വ്യവസ്ഥയുടെ അടിസ്ഥാന സ്തംഭവും സൗദി വിഷന്‍ 2030 ന്റെ തൂണുകളിലൊന്നുമാണ്. ഈ മേഖലയിലെ വൻ നിക്ഷേപ പദ്ധതികള്‍ പ്രത്യേകിച്ച് നിയോം, ഖിദ്ദിയ, ദിരിയ പോലുള്ള പോലുള്ള ടൂറിസ്റ്റ് നഗരങ്ങളുടെ നിര്‍മാണം അടുത്ത 15 വര്‍ഷത്തിനുള്ളില്‍ 500 ബില്യണ്‍ ഡോളറിന്റെ നിക്ഷേപം പ്രതീക്ഷിക്കുന്നതായും അദ്ദേഹം അറിയിച്ചു.
ചെങ്കടല്‍ ടൂറിസം ഡെസ്റ്റിനേഷനുകളിൽ ഇതിനകം പ്രവര്‍ത്തനം ആരംഭിച്ച റിസോര്‍ട്ടുകളും ഹോട്ടലുകളും 50 ശതമാനം പ്രാദേശികവല്‍ക്കരണ നിരക്കില്‍ എത്തിയിട്ടുണ്ടെന്നും ഇതില്‍ ഹഖ്ല്‍, അല്‍ – വാജ് എന്നിവിടങ്ങളില്‍ നിന്നുള്ള നിരവധി സൗദികളും ഉള്‍പ്പെടുന്നുവെന്നും മന്ത്രി വെളിപ്പെടുത്തി. ചെങ്കടലില്‍ 15 ലധികം റിസോര്‍ട്ടുകള്‍ 2025ല്‍ തുറക്കുമെന്നും അദ്ദേഹം കൂട്ടിച്ചേര്‍ത്തു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല