യുഎഇയിൽ സ്വദേശിവല്‍ക്ക രണം കുതിക്കുന്നു; സ്വകാര്യ കമ്പനികളിലെ സ്വദേശികളുടെ എണ്ണം മൂന്നിരട്ടിയായി

സ്വന്തം ലേഖകൻ: യുഎഇയില്‍ നടപ്പാക്കിയ സ്വദേശിവല്‍ക്കരണം ഫലംകാണുന്നതായി മാനവ വിഭവശേഷി, എമിറേറ്റൈസേഷന്‍ മന്ത്രാലയം ട്വീറ്റ് ചെയ്തു. 2018നെ അപേക്ഷിച്ച് സ്വകാര്യ കമ്പനികളില്‍ ജോലിചെയ്യുന്ന യുഎഇ പൗരന്മാരുടെ എണ്ണം ഏകദേശം മൂന്നിരട്ടിയായി വര്‍ധിച്ചെന്നും മന്ത്രാലയം അറിയിച്ചു. യുഎഇയുടെ സ്വകാര്യ മേഖലയില്‍ 80,000ത്തിലധികം ഇമാറാത്തികളാണ് ഇപ്പോള്‍ ജോലി ചെയ്യുന്നത്.

യുഎഇ തൊഴില്‍ വിപണിയുടെ പരിണാമത്തിന് സംഭാവന നല്‍കിയ ഗവണ്‍മെന്റിന്റെ പ്രസക്തമായ തീരുമാനങ്ങള്‍ക്കും നയങ്ങള്‍ക്കും പരിപാടികള്‍ക്കും നന്ദി രേഖപ്പെടുത്തുന്നതായി അറിയിച്ചുകൊണ്ടാണ് ട്വീറ്റ്. 2018ല്‍ സ്വകാര്യ മേഖലയില്‍ 27,055 യുഎഇ പൗരന്‍മാരാണ് ഉണ്ടായിരുന്നത്.

2021ല്‍, സ്വകാര്യ മേഖലയില്‍ ജോലിചെയ്യുന്ന സ്വദേശികളുടെ എണ്ണം 29,810 ആയിരുന്നത് 2022 അവസാനത്തോടെ ഏകദേശം ഇരട്ടിയായി 50,228 ലെത്തി. സ്വദേശിവല്‍ക്കരണം വര്‍ധിപ്പിക്കാന്‍ ലക്ഷ്യമിട്ടുള്ള ഫെഡറല്‍ ഗവണ്‍മെന്റ് സംരംഭമായ നഫീസ് 2022ല്‍ മികച്ച ഫലംചെയ്‌തെന്നും മന്ത്രാലയം വിലയിരുത്തി.

സ്വദേശിവല്‍ക്കരണം വിപുലീകരിക്കുമെന്ന് ഏതാനും ദിവസം മുമ്പ് മന്ത്രാലയം പ്രഖ്യാപിച്ചിരുന്നു. 20 ജീവനക്കാരുള്ള സ്ഥാപനങ്ങളും പരിധിയില്‍ പെടുത്തി. നേരത്തെ 50 ജിവനക്കാരുള്ള സ്ഥാപനങ്ങള്‍ക്ക് മാത്രമാണ് നിശ്ചിത ശതമാനം സ്വദേശികള്‍ വേണമെന്ന നിബന്ധന ഉണ്ടായിരുന്നത്. തെരഞ്ഞെടുക്കപ്പെട്ട 14 വിഭാഗങ്ങളില്‍ പെട്ട 20 ജീവനക്കാരുള്ള കമ്പനികളെയും സ്ഥാപനങ്ങള്‍ക്കുമാണ് നിയമം ബാധകം.

സ്വദേശികളായ പ്രതിഭകളെ വൈദഗ്ധ്യമുള്ള തൊഴിലുകളിലേക്ക് ആകര്‍ഷിക്കുന്നതിനുള്ള നടപടികളും ശക്തമാക്കിയിട്ടുണ്ട്. വ്യാജ സ്വദേശിവല്‍ക്കരണത്തിന്റെ പേരില്‍ 400ലേറെ സ്വകാര്യ കമ്പനികള്‍ക്കാണ് കഴിഞ്ഞ ഒരു വര്‍ഷത്തിനിടെ സാമ്പത്തിക പിഴ ചുമത്തിയത്. സ്വദേശികളെ ജോലിക്ക് നിയോഗിച്ചതായി രേഖയുണ്ടാക്കുകയും ഫലത്തില്‍ അവര്‍ ജോലിക്ക് വരാതിരിക്കുകയും ചെയ്ത നിയമലംഘനങ്ങളാണ് കൂടുതല്‍.

കടുത്ത നിയമലംഘനം നടത്തുന്ന സ്ഥാപനങ്ങള്‍ക്ക് പിഴ ചുമത്തുന്നതിനു പുറമേ മന്ത്രാലയത്തില്‍ നിന്നുള്ള സേവനങ്ങള്‍ നിര്‍ത്തലാക്കുകയും ചെയ്യും. കമ്പനികളെ ഏറ്റവും താഴ്ന്ന വിഭാഗത്തിലേക്ക് തരംതാഴ്ത്തപ്പെടുന്നതോടെ വീസ അനുവദിക്കല്‍, പുതുക്കല്‍, ലൈസന്‍സ് പോലുള്ള എല്ലാ മന്ത്രാലയ സേവനങ്ങള്‍ക്ക് കമ്പനികള്‍ ഉയര്‍ന്ന ഫീസ് നല്‍കേണ്ടിയുംവരും. ഗുരുതരമായ ലംഘനങ്ങള്‍ നടത്തിയാല്‍ മറ്റുനിയമനടപടികള്‍ക്കായി പബ്ലിക് പ്രോസിക്യൂഷന് റഫര്‍ ചെയ്യും.