സ്വന്തം ലേഖകൻ: യുഎഇ പ്രവാസി ജീവനക്കാരില്‍ മൂന്നിലൊന്നിലധികം പേരും (37 ശതമാനം) രാജ്യത്ത് വിരമിക്കാന്‍ ആഗ്രഹിക്കുന്നതായി സര്‍വേ റിപ്പോര്‍ട്ട്. രണ്ടായിരത്തിലധികം പ്രവാസികളെയും നാട്ടുകാരെയും ഉള്‍പ്പെടുത്തി നാഷണല്‍ ബോണ്ട്‌സ് ആണ് സര്‍വേ നടത്തിയത്. ഗോള്‍ഡന്‍ വീസയും റിട്ടയര്‍മെന്റ് വീസ ഓപ്ഷനുകളും കാരണം രാജ്യത്ത് കൂടുതല്‍ പേര്‍ വിരമിക്കുന്നുണ്ടെന്ന് നാഷണല്‍ ബോണ്ട് സിഇഒ മുഹമ്മദ് ഖാസിം അല്‍ അലി ചൂണ്ടിക്കാട്ടി.
സര്‍വേയില്‍ എട്ട് ശതമാനം പേര്‍ മാത്രമാണ് സ്വന്തം രാജ്യത്തേക്ക് മടങ്ങാന്‍ പദ്ധതിയിട്ടതായി അറിയിച്ചത്. എട്ട് ശതമാനം പേര്‍ തങ്ങളുടെ സ്വപ്‌ന ലക്ഷ്യമായ രാജ്യത്തേക്ക് കുടിയേറാന്‍ ആഗ്രഹിക്കുന്നതായും കണ്ടെത്തി. ബാക്കിയുള്ളവര്‍ വിരമിക്കുന്ന കാര്യത്തില്‍ ഇതുവരെ തീരുമാനമെടുത്തിട്ടില്ല.
നാഷണല്‍ ബോണ്ട് സേവിംഗ്‌സ് ഇന്‍ഡക്‌സ് അനുസരിച്ച്, യുഎഇ നിവാസികളില്‍ 84 ശതമാനം പേരും ഒരു എമര്‍ജന്‍സി ഫണ്ട് ഉണ്ടായിരിക്കേണ്ടത് പ്രധാനമാണെന്ന് വിശ്വസിക്കുന്നു. ഭൂരിഭാഗം പേരും ഒരു ബിസിനസ്സ് സ്വന്തമാക്കാനും വീട് വാങ്ങാനും സ്വന്തം അല്ലെങ്കില്‍ കുട്ടികളുടെ വിദ്യാഭ്യാസം സുരക്ഷിതമാക്കാനും ആഗ്രഹിക്കുന്നതായും സര്‍വേ കൂട്ടിച്ചേര്‍ത്തു.
കോവിഡ് -19ന് പകര്‍ച്ചവ്യാധിക്ക് ശേഷം യുഎഇ നിവാസികള്‍ സമ്പാദ്യത്തിലേക്ക് കൂടുതല്‍ താല്‍പര്യം കാണിക്കുന്നുവെന്ന് അല്‍ അലി വെളിപ്പെടുത്തി. 64 ശതമാനം ആളുകളും വിശ്വസനീയമായ ഒരു ഫണ്ട് സ്ഥാപിക്കാനുള്ള വഴിയിലാണ് എന്ന് സര്‍വേ കണ്ടെത്തി.
സര്‍വേയില്‍ പ്രതികരിച്ചവര്‍ തങ്ങളുടെ വരുമാനത്തിന്റെ 20 ശതമാനത്തിലധികം മിച്ചംപിടിക്കാനോ നിക്ഷേപിക്കാനോ ശ്രമിക്കുന്നവരാണ്. ശമ്പളം കിട്ടയ ഉടന്‍ ബില്ലുകള്‍ അടയ്ക്കാന്‍ തുടങ്ങുന്നതിനുമുമ്പ് തന്നെ നിശ്ചിത തുക മാറ്റിവയ്ക്കുന്നവരാണിവര്‍. വിരമിക്കലിന് മുന്നോടിയായി 10 അല്ലെങ്കില്‍ 20 ശതമാനം സേവിങ്‌സിനായി മാറ്റിവയക്കണമെന്ന് നാഷണല്‍ ബോണ്ട്‌സ് ചീഫ് എക്‌സിക്യൂട്ടീവ് ഉപദേശിച്ചു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല