സ്വന്തം ലേഖകൻ: മിക്ക പ്രവാസികളും സ്വന്തംനാട്ടിലെ വിവാഹങ്ങളിലും മറ്റ് ആഘോഷങ്ങളിലോ പങ്കെടുക്കുന്നതിന് അവരുടെ വാര്‍ഷിക അവധി വളരെ മുമ്പേ ആസൂത്രണം ചെയ്യുന്നവരാണ്. അമിത വിമാന യാത്രാക്കൂലി നല്‍കേണ്ടിവരുന്നത് ഒരു പരിധിവരെ ഒഴിവാക്കാന്‍ അവധിദിനങ്ങള്‍ നേരത്തേ അറിയുന്നതിലൂടെ സാധിക്കുന്നു. യുഎഇയില്‍ കഴിയുന്ന യൂറോപ്പുകാരും ഒരു വര്‍ഷം മുമ്പേ തണുപ്പുള്ള കാലാവസ്ഥയിലേക്ക് തങ്ങളുടെ അവധിക്കാലം ആസൂത്രണം ചെയ്യാറുണ്ട്. വീസ പുതുക്കല്‍ പോലുള്ള പ്രശ്‌നങ്ങളും അവധിക്കാലത്തെ ബാധിക്കാറുണ്ട്.
ഈ വര്‍ഷം പകുതിയിലധികം പിന്നിടുമ്പോള്‍, യുഎഇ നിവാസികള്‍ക്ക് 2023ല്‍ രണ്ട് നീണ്ട വാരാന്ത്യ അവധിദിനങ്ങള്‍ മാത്രമാണ് ശേഷിക്കുന്നത്. പുതിയ ഹിജ്‌റ വര്‍ഷാരംഭമായ ജൂലൈ 21 വെള്ളി മുതല്‍ ജൂലൈ 23 ഞായര്‍ വരെയുള്ള മൂന്ന് ദിവസങ്ങളും സെപ്റ്റംബര്‍ 29 വെള്ളിയാഴ്ച മുതല്‍ ഒക്ടോബര്‍ ഒന്ന് ഞായര്‍ വരെയുള്ള രണ്ടാമത്തെ നീണ്ട ഇടവേളയും. യുഎഇ ദേശീയ ദിനം ആഘോഷിക്കുന്നതിനാണ് വര്‍ഷത്തിലെ അവസാന അവധി: ഡിസംബര്‍ 2, 3 (ശനി, ഞായര്‍) തിയതികളില്‍.
എന്നാല്‍, അടുത്തവര്‍ഷം ഒമ്പത് ദിവസത്തെ നീണ്ട അവധി ലഭിച്ചേക്കും. ഈദുല്‍ ഫിത്തറിന്റെ വേളയില്‍ 2024 ന്റെ ആദ്യ പകുതിയില്‍ 9 ദിവസത്തെ ഇടവേള വരെ ആസ്വദിക്കാന്‍ സാധ്യതയുണ്ട്. ജ്യോതിശാസ്ത്ര കണക്കുകൂട്ടലുകളെ അടിസ്ഥാനമാക്കി, വിശുദ്ധ റമദാന്‍ മാസം 2024 മാര്‍ച്ച് 11 തിങ്കളാഴ്ച ആരംഭിക്കുമെന്നും 30 ദിവസം നീണ്ടുനില്‍ക്കുമെന്നും പ്രതീക്ഷിക്കുന്നു. അതിനാല്‍, ഈദ് അല്‍ ഫിത്തര്‍ 2024 ഏപ്രില്‍ 10 ബുധനാഴ്ച പ്രതീക്ഷിക്കുന്നു.
യുഎഇ സര്‍ക്കാര്‍ പ്രഖ്യാപനമനുസരിച്ച്, പൊതുസ്വകാര്യ മേഖലയിലെ ജീവനക്കാര്‍ക്ക് റമദാന്‍ 29 മുതല്‍ ഷവ്വാല്‍ മൂന്നു വരെ ഈദുല്‍ ഫിത്തര്‍ അവധിയാണ്. അതായത് ഏപ്രില്‍ 8 തിങ്കളാഴ്ച മുതല്‍ ഏപ്രില്‍ 12 വെള്ളിയാഴ്ച വരെ അവധി ലഭിക്കും. മുന്നിലും പിന്നിലുമുള്ള രണ്ട് വാരാന്ത്യ ദിനങ്ങള്‍ കൂടി കൂട്ടിയാല്‍ ഏപ്രില്‍ 6 ശനിയാഴ്ച മുതല്‍ ഏപ്രില്‍ 14 ഞായറാഴ്ച വരെ ഒമ്പത് ദിവസത്തെ ഇടവേള ലഭിക്കും.
2024ലെ ഈദുല്‍ അദ്ഹ ജൂണ്‍ 17 തിങ്കളാഴ്ച ആരംഭിക്കുമെന്ന് എമിറേറ്റ്‌സ് അസ്‌ട്രോണമി സെന്റര്‍ ചെയര്‍മാന്‍ ഇബ്രാഹിം അല്‍ ജര്‍വാനെ പറഞ്ഞു. പെരുന്നാള്‍ പ്രഖ്യാപിച്ച തീയതിയില്‍ വന്നാല്‍, യുഎഇയിലെ ജീവനക്കാര്‍ക്ക് ജൂണ്‍ 15 ശനിയാഴ്ച മുതല്‍ ജൂണ്‍ 19 ബുധനാഴ്ച വരെ അഞ്ച് ദിവസത്തെ ഇടവേള ലഭിക്കും. ഗ്രിഗോറിയന്‍ കലണ്ടറില്‍ നിന്ന് വ്യത്യസ്തമായി, ഇസ്ലാമിക (അല്ലെങ്കില്‍ ഹിജ്‌രി) കലണ്ടര്‍ ചന്ദ്രന്റെ ദര്‍ശനത്തെ അടിസ്ഥാനമാക്കിയുള്ളതാണ് എന്നതിനാല്‍ തീയതികള്‍ മാറ്റത്തിന് വിധേയമാണ്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല