സ്വന്തം ലേഖകൻ: രാജ്യത്തിന്റെ നിക്ഷേപനയം കൂടുതൽ ശക്തപ്പെടുത്തുന്നതിന് വേണ്ടി നേതൃത്വം നൽകാൻ ആണ് യുഎഇ പ്രത്യേക നിക്ഷേപ മന്ത്രാലയം സ്ഥാപിച്ചത്. അബുദാബിയിലെ അൽ വത്ൻ കൊട്ടാരത്തിൽ ചേർന്ന യുഎഇ മന്ത്രിസഭയോഗ തീരുമാനമനുസരിച്ചാണ് പുതിയ പ്രഖ്യാപനം വന്നിരിക്കുന്നത്. നിക്ഷേപക മന്ത്രിയായി മുഹമ്മദ് ഹസൻ അൽ സുവൈദിയെ തീരുമാനിച്ചു.
നിക്ഷേപനയവും ലക്ഷ്യവും രൂപപ്പെടുത്തുക, രാജ്യത്തെ കൂടുതൽ ഉയരങ്ങളിലേക്ക് എത്തിക്കുക. നിയമനിർമാണവും നടപടിക്രമങ്ങളും വേഗത്തിൽ പൂർത്തിയാക്കുക തുടങ്ങിയ ചുമതലകൾ ആണ് ഈ മന്ത്രാലയത്തിന് കീഴിൽ നിശ്ചയിച്ചിരിക്കുന്നത്. അതിവേഗം വളരുന്ന നിക്ഷേപക രാജ്യങ്ങളിൽ ഒന്നാണ് യുഎഇ. അതുകൊണ്ട് തന്നെ പുതിയ മന്ത്രാലയ രൂപവത്കരണം രാജ്യത്തിന്റെ ഭാവി വളർച്ചക്ക് വലിയ മുതൽക്കൂട്ടാകുമെന്നാണ് വിലയിരുത്തപ്പെടുന്നത്.
പ്രസിഡന്റും പ്രധാനമന്ത്രിയും ഭരണാധികാരിയുമായ ഷെയ്ഖ് മുഹമ്മദ് ബിൻ റാശിദ് ആൽ മക്തൂമിന്‍റെ അധ്യക്ഷതയിലാണ് മന്ത്രിസഭ യോഗം ചേർന്നത്. പശ്ചിമേഷ്യയിലെ ഏറ്റവും കൂടുതൽ വിദേശ നിക്ഷേപം ആകർഷിക്കുന്ന രാജ്യങ്ങളിലൊന്നാണ് യുഎഇ. ഗ്രീൻഫീൽഡ് വിദേശ നിക്ഷേപം ഏറ്റവും കൂടുതൽ ആകർഷിക്കുന്ന നഗരങ്ങളുടെ പട്ടികയിൽ ദുബായ് ഒന്നാം സ്ഥാനത്താണ് ഉള്ളത്.
പുനരുപയോഗ ഊർജത്തിന്‍റെ ഉൽപാദനം മൂന്നിരട്ടിയായി വർധിപ്പിക്കാൻ സാധിക്കുന്ന ദേശീയ ഊർജ പദ്ധതിക്കും മന്ത്രിസഭ അംഗീകാരം നൽകി. അടുത്ത ഏഴു വർഷത്തിനകം ഇത് നടപ്പിലാക്കും. ഈ കാലയളവിൽ 150 ബില്യൺ ദിർഹം മുതൽ 200 ബില്യൺ ദിർഹം വരെ ഈ മേഖലയിൽ നിക്ഷേപിക്കാൻ ആണ് തീരുമാനിച്ചരിക്കുന്നത്. സാമ്പത്തിക വളർച്ചക്കനുസരിച്ച് ഊർജ ആവശ്യകത വർധിച്ച സാഹചര്യത്തിലാണ് യുഎഇ പുതിയ തീരുമാനം സ്വീകരിച്ചിരിക്കുന്നത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല