ബൈഡന് കീറാമുട്ടിയായി മെക്സിക്കോ അതിർത്തി കുടിയേറ്റം; അവസരം മുതലെടുക്കാൻ ട്രംപ്

സ്വന്തം ലേഖകൻ: യുഎസ്-മെക്സിക്കോ അതിർത്തി കടക്കുന്ന കുടിയേറ്റക്കാരുടെ എണ്ണം സമീപകാലത്ത് കുതിച്ചുയരുകയാണ്. ഇത് പ്രസിഡന്റ് ജോ ബൈഡനെ രാഷ്ട്രീയമായി പ്രതിരോധത്തിലാക്കുന്നതായാണ് യുഎസിൽ നിന്നുള്ള റിപ്പോർട്ടുകൾ സൂചിപ്പിക്കുന്നത്. അടുത്ത വർഷം നടക്കാനിരിക്കുന്ന പ്രസിഡൻറ് തെരഞ്ഞെടുപ്പിൽ അദ്ദേഹത്തിന്റെ ഏറ്റവും അടുത്ത സഖ്യകക്ഷികളായ സംസ്ഥാന, പ്രാദേശിക ഡെമോക്രാറ്റിക് നേതാക്കൾ ബൈഡൻ കുടിയേറ്റം കൈകാര്യം ചെയ്യുന്നതിനെ രൂക്ഷമായി വിമർശിക്കുന്നു.

ബൈഡൻ്റെ 2024-ലെ റിപ്പബ്ലിക്കൻ എതിരാളിയായ ഡൊണാൾഡ് ട്രംപ്, ഏകദേശം ഒരു ദശാബ്ദക്കാലമായി തന്റെ രാഷ്ട്രീയ ആയുധമായ അതിർത്തി കുടിയേറ്റ പ്രശ്നം പൊടിതട്ടിയെടുത്ത് ആക്രമണങ്ങൾക്ക് മൂർച്ച കൂട്ടുകയാണ്. ഈ സാഹചര്യത്തിൽ ബിഡനുള്ള പൊതുജന പിന്തുണ കുറയുന്നതും ശ്രദ്ധേയം.

യുഎസ്-മെക്‌സിക്കോ അതിർത്തിയിൽ നിന്ന് പുതുതായി വന്ന കുടിയേറ്റക്കാരെ റിപ്പബ്ലിക്കൻ ഗവർണർമാർ ആയിരക്കണക്കിന് മൈലുകൾ അകലെ ഡെമോക്രാറ്റിക് നടത്തുന്ന നഗരങ്ങളിലേക്ക് അയയ്‌ക്കുന്നതും വിവാദത്തിന് തിരികൊളുത്തുന്നു. സിബിഎസ് ന്യൂസിന് ലഭിച്ച പ്രാഥമിക യുഎസ് ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റി കണക്കുകൾ പ്രകാരം, സെപ്തംബർ മാസത്തിൽ യുഎസിലേക്ക് പ്രവേശിച്ച ഏകദേശം 210,000 രേഖകളില്ലാത്ത കുടിയേറ്റക്കാരെ യുഎസ് ബോർഡർ പട്രോൾ പിടികൂടി.

ഈ വർഷത്തെ ഏറ്റവും ഉയർന്ന കണക്കാണിത്. അതിർത്തിയിലെ പ്രതിസന്ധി പരിഹരിക്കാനുള്ള സർക്കാർ നയ മാറ്റങ്ങൾക്ക് ശേഷം ദേശീയ ശ്രദ്ധ മറ്റ് വിഷയങ്ങളിലേക്ക് തിരിക്കാനാണ് ബൈഡൻ ഭരണകൂടത്തിൻ്റെ ശ്രമം. എന്നാൽ ഈ പുതിയ കണക്കുകൾ ആ കണക്കുകൂട്ടലുകൾ തെറ്റിക്കുന്നത്.

അതിലുപരിയായി, കുടിയേറ്റക്കാരുടെ എണ്ണത്തിലുള്ള കുതിച്ചുചാട്ടം നിക്കോളാസ് മഡുറോയുടെ സോഷ്യലിസ്റ്റ് സ്വേച്ഛാധിപത്യത്തിൻകീഴിൽ രാഷ്ട്രീയവും സാമ്പത്തികവുമായ വെല്ലുവിളികളിലൂടെ കടന്നുപോകുന്ന തെക്കേ അമേരിക്കൻ രാഷ്ട്രമായ വെനസ്വേലയി നിന്നാണ്. ഈ
വെനസ്വേലൻ പലായനം ഒരു അഭയാർത്ഥി പ്രതിസന്ധി തന്നെ സൃഷ്ടിച്ചു,

ഏഴ് ദശലക്ഷത്തിലധികം ആളുകൾ രാജ്യം വിട്ട് പലായനം ചെയ്തപ്പോൾ അതിന്റെ അനന്തരഫലങ്ങൾ യുഎസ് മണ്ണിലാണ് കൂടുതലായി അനുഭവപ്പെടുന്നത്. പനാമ ഗവൺമെന്റിന്റെ കണക്കനുസരിച്ച്, കഴിഞ്ഞ രണ്ട് മാസത്തിനുള്ളിൽ 150,000-ത്തിലധികം വെനസ്വേലക്കാർ വടക്കോട്ട് യുഎസിലേക്ക്, ഡാരിയൻ ഗ്യാപ്പിലൂടെ എത്തിച്ചേർന്നിട്ടുണ്ട്.

കഴിഞ്ഞ ദിവസം യുഎസ്-മെക്സിക്കോ അതിർത്തിയിൽ മതിലിന്റെ അധിക ഭാഗങ്ങൾ നിർമ്മിക്കാൻ ഫണ്ട് അനുവദിച്ച ബൈഡൻ്റെ നടപടി ഈ പ്രശ്നം അടിയന്തിരമായി പരിഹരിക്കാനുള്ള ശ്രമമാണ്. വെനസ്വേലൻ പൗരന്മാരുടെ നേരിട്ടുള്ള നാടുകടത്തൽ യുഎസ് പുനരാരംഭിക്കുമെന്നും അദ്ദേഹം വെളിപ്പെടുത്തി. ഇരു രാജ്യങ്ങളും തമ്മിൽ നയതന്ത്രബന്ധം മോശമായതിനെ തുടർന്ന് ഇത് താൽക്കാലികമായി നിർത്തിവച്ചിരിക്കുകയായിരുന്നു.