സ്വന്തം ലേഖകൻ: വിദേശത്ത്‌ പോകുന്നവര്‍ക്കുള്ള വാക്‌സിനേഷനെക്കുറിച്ചുള്ള സംശയങ്ങള്‍ക്കു മറുപടിയുമായി സംസ്ഥാന ആരോഗ്യ വകുപ്പ്‌. വിദേശ രാജ്യങ്ങളില്‍ പോകുന്നവര്ക്ക് കോവിഷീല്‍ഡ്‌ രണ്ടാം ഡോസ്‌ വാക്‌സിന്‍ 4 മുതല്‍ 6 ആഴ്‌ചയ്‌ക്കുള്ളില്‍ നല്‍കാനും പ്രത്യേക വാക്‌സിനേഷന്‍ സര്‍ട്ടിഫിക്കറ്റ്‌ നല്‍കാനും ആരോഗ്യ വകുപ്പ്‌ കഴിഞ്ഞ ദിവസം മാര്‍ഗനിര്‍ദേശംപുറത്തിറക്കിയിരുന്നു.
ഇതു സംബന്ധിച്ചുള്ള സംശയങ്ങളാണ്‌ ആരോഗ്യ വകുപ്പ്‌ ദൂരികരിക്കുന്നതെന്നു മന്ത്രി വീണാ ജോര്‍ജ്‌ വ്യക്‌തമാക്കി.
കോവിഷീല്‍ഡ്‌/കോവാക്‌സിന്‍ രണ്ടു ഡോസ്‌ സ്വീകരിക്കുകയും വിദേശയാത്രയ്‌ക്കായി വാക്‌സിനേഷന്‍ സര്‍ട്ടിഫിക്കറ്റില്‍ പാസ്‌പോര്‍ട്ട്‌ നമ്പര്‍ ഉള്‍പ്പെടുത്തുകയും ചെയ്യേണ്ട, 18 വയസിനു മുകളില്‍ പ്രായമുള്ളവര്‍ക്കാണ്‌ സംസ്ഥാന സര്‍ക്കാര്‍ നല്‍കുന്ന കോവിഡ്‌ വാക്‌സിനേഷന്‍ സര്‍ട്ടിഫിക്കറ്റിന്‌ അര്‍ഹതയുള്ളത്‌.
കൂടാതെ കോവിഷീല്‍ഡ്‌ വാക്‌സിന്‍ സ്വീകരിക്കുകയും എന്നാല്‍, വിദേശ രാജ്യങ്ങളുടെ വാക്‌സിന്‍ നയപ്രകാരം വിദേശ യാത്രയ്‌ക്കായി വാക്‌സിനേഷന്‍ സര്‍ട്ടിഫിക്കറ്റില്‍ കോവിഷീല്‍ഡ്‌ എന്നതിന്‌ പകരം ഓക്‌സ്‌ഫോര്‍ഡ്‌ അസ്‌ട്രാസിനക്ക എന്നു രേഖപ്പെടുത്തേണ്ടത്‌ അനിവാര്യമായവര്‍ക്കും നിലവിലെ വാക്‌സിനേഷന്‍ സ്‌ഥിതി അനുസരിച്ച്‌ അന്തിമ/ പ്ര?വിഷണല്‍ സര്‍ട്ടിഫിക്കറ്റ്‌ ആവശ്യമുള്ളവര്‍ക്കും സര്‍ട്ടിഫിക്കറ്റ്‌ ലഭ്യമാക്കും.
സർട്ടിഫിക്കറ്റ് ലഭിക്കാൻ
രണ്ടാം ഡോസ്‌ സ്വീകരിച്ചതിനു ശേഷം വാക്‌സിനേഷന്‍ കേന്ദ്രത്തില്‍നിന്ന്‌ താത്‌കാലികമായി ഒരു സര്‍ട്ടിഫിക്കറ്റ്‌ ലഭിക്കും. തുടര്‍ന്ന്‌ വെബ്‌സൈറ്റ്‌ സന്ദര്‍ശിച്ച്‌ വാക്‌സിനേഷന്‍ കേന്ദ്രത്തില്‍നിന്ന്‌ ലഭിച്ച സര്‍ട്ടിഫിക്കറ്റും മറ്റ്‌ വ്യക്‌തിഗത വിവരങ്ങളും നല്‍കുക. സമര്‍പ്പിക്കപ്പെട്ട അപേക്ഷകള്‍ ജില്ലാ മെഡിക്കല്‍ ഓഫീസര്‍ പരിശോധിച്ച്‌ അര്‍ഹതയുള്ളവര്‍ക്ക്‌ സര്‍ട്ടിഫിക്കറ്റ്‌ നല്‍കും.
അപേക്ഷ അംഗീകരിച്ചിട്ടുണ്ടെങ്കില്‍ രജിസ്‌റ്റര്‍ ചെയ്‌തിട്ടുള്ള മൊബൈല്‍ നമ്പറില്‍ എസ്‌.എം.എസ്‌. ലഭിക്കും. അംഗീകരിക്കപ്പെട്ട അപേക്ഷകര്‍ക്ക്‌ സര്‍ട്ടിഫിക്കറ്റ്‌ ഓണ്‍ലൈനായി ഡൗണ്‍ലോഡ്‌ ചെയ്‌ത്‌ സൂക്ഷിക്കാം.
അപേക്ഷ നിരസിക്കപ്പെടുകയാണെങ്കില്‍ അതിനുള്ള കാരണം കാണിക്കുന്ന എസ്‌.എം.എസ്‌. ലഭിക്കും. ആവശ്യമായ തിരുത്തലുകള്‍ വരുത്തി വീണ്ടും അപേക്ഷിക്കാം.
രണ്ടാമത്തെ ഡോസ്‌ വാക്‌സിന്‍ നേരത്തേ ലഭിക്കാന്‍
മുന്‍ഗണന ലഭിക്കാനായി വൈബ്‌സൈറ്റില്‍ അപേക്ഷിക്കുക. ഇതിനുള്ള സംവിധാനം ഉടന്‍ തന്നെ വെബ്‌സൈറ്റില്‍ ലഭ്യമാകും. അപേക്ഷിക്കുന്ന സമയത്ത്‌ യാത്രാ വിവരത്തിന്റെ രേഖകള്‍ അപ്‌ലോഡ്‌ ചെയ്യണം. രണ്ടാം ഡോസ്‌ വാക്‌സിന്‍ നേരത്തേ എടുത്തിട്ടുള്ളവര്‍ക്ക്‌ സംസ്‌ഥാനം നല്‍കുന്ന സര്‍ട്ടിഫിക്കറ്റ്‌ ലഭിക്കാനായി പ്രത്യേകം അപേക്ഷിക്കണം. രണ്ടാം ഡോസ്‌ സ്വീകരിച്ച സമയത്ത്‌ മെഡിക്കല്‍ ഓഫീസര്‍ നല്‍കിയിട്ടുള്ള പ്ര?വിഷണല്‍ സര്‍ട്ടിഫിക്കറ്റ്‌ കൂടി ഇവര്‍ അപ്‌ലോഡ്‌ ചെയ്യണം.
വിദേശത്തു വച്ച്‌ ആസ്‌ട്രസിനക്ക വാക്‌സിന്‍ ആദ്യ ഡോസ്‌ സ്വീകരിച്ചവര്‍ക്ക്‌ സംസ്‌ഥാനത്ത്‌ നിന്നു രണ്ടാം ഡോസ്‌ കോവിഷീല്‍ഡ്‌ വാക്‌സിന്‍ സ്വീകരിക്കാം. അവര്‍ വാക്‌സിനേഷന്‍ കേന്ദ്രത്തിലെത്തി രണ്ടാം ഡോസിനായി രജിസ്‌റ്റര്‍ ചെയ്യണം. തുടര്‍ന്ന്‌ ആദ്യ ഡോസിന്റെ വിവരങ്ങള്‍ കോവിന്‍ സൈറ്റില്‍ നല്‍കും. രണ്ടാം ഡോസ്‌ നല്‍കിയ വിവരം രേഖപ്പെടുത്തിയതിനു ശേഷം അവര്‍ക്ക്‌ കോവിന്‍ സൈറ്റില്‍നിന്ന്‌ അന്തിമ സര്‍ട്ടിഫിക്കറ്റ്‌ ലഭിക്കും. കൂടുതല്‍ സംശയങ്ങള്‍ക്ക്‌ ദിശ: 1056, 104 എന്ന നമ്പരുകളില്‍ ബന്ധപ്പെടാം.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല